नेकपा एकीकृत समाजवादीकी सचिव रामकुमारी झाक्रीले वर्तमान सत्ता गठबन्धनलाई निरन्तरता दिनुपर्ने उल्लेख गरेकी छन् । पछिल्लो समय पार्टी नेतृत्वप्रति असन्तुष्ट रहेको चर्चा चलिरहेका बेला पूर्वमन्त्रीसमेत रहेकी उनले आफू गठबन्धनलाई निरन्तरता दिनुपर्ने पक्षमा रहेको स्पष्ट पारेकी हुन् । उनी मन्त्रीबाट हटाइएपछि असन्तुष्ट रहेको राजनीतिक वृत्तमा चर्चा चलिरहेको छ । 

नेकपा एस निर्वाचन आयोगमा दर्ता गरेको एक वर्ष पुगेको उपलक्ष्यमा सामाजिक सञ्जालमा सन्देश लेख्दै उनले आजको दिनलाई मूल्यको राजनीतिको मानक बनाउन चुनौतीपूर्ण अवस्थामा पाइला अगाडि बढाएको दिनका रुपमा स्मरण गरेकी छन् । 

उनले आगामी निर्वाचनमा गठबन्धनमार्फत अगाडि बढ्ने स्पष्ट पारेकी छन् । उनले लेखेकी छन्, ‘आसन्न निर्वाचन हामी गठबन्धनमै अगाडि बढ्ने हाम्रो संकल्प छ । गठबन्धन आजको आवश्यकता हो । संविधानलाई गतिदिन, संविधानलाई सही मार्गमा चलाउन, आर्थिक एजेण्डालाई प्राथमिकतामा राखी आर्थिक विकास र समृद्धिको बाटोमा मुलुकलाई मार्गदर्शन गर्न, जनभावनाको कदर गर्न गठबन्धन अनिवार्य छ ।’ 

उनले फेसबुकमा लेखेको सन्देश जस्ताको तस्तै

गतवर्ष आजकै दिन मेरो जिन्दगीको एउटा कठिन राजनीतिक निर्णय लिएको दिन हो । मेरा पिता समानका नेता कमरेड माधवकुमार नेपालको हात समातेर निर्वाचन आयोग पुगेको दिन हो । हामीले राजनीतिमा अर्को एउटा मूल्यको राजनीतिको मानक बनाउन चुनौतिपूर्ण अवस्थामा पाइला अगाडि बढाएको दिन हो ।

स्वभावैले मैले मेरो निर्णय लिँदा दाँया–बाँयाका मेरा आफ्ना राजनीतिक अभिभावक छोडेर आएको दिन थियो । सामान्यतः म मेरो निर्णय लिन सधै स्वतन्त्र नै हुन्छु । राजनीतिमा लाग्ने मान्छे अलि बढी स्वतन्त्र नै हुन्छन् । स्वतन्त्रता यानेकी ‘आजादी’को त्यही प्यासनले होला जोखिम मोल्न र चुनौतिपूर्ण अवस्थामा निर्णय लिन सक्षम हुन्छन् । 

हो हाम्रो विद्रोह त्यही थियोः संविधानलाई बचाउन, सात दशक लामो संघर्षको उपल्धिको रक्षा गर्न, यो राजनितीक प्रणालीलाई बचाउन र नेपालको राजनितीलाई जनचाहाना अनुसार संचालन गर्न गर्न ।

आज यिनै उपलब्धिको रक्षा गर्ने र  विद्रोहको औचित्य पुष्टि गर्ने समय हो । आसन्न निर्वाचन हामी गठबन्धनमै अगाडि बढ्ने हाम्रो संकल्प छ । गठबन्धन आजको आवश्यकता हो । संविधानलाई गति दिन, संविधानलाई सही मार्गमा चलाउन, आर्थिक एजेण्डालाई प्राथमिकतामा राखी आर्थिक विकास र समृद्धिको बाटोमा मुलुकलाई मार्गदर्शन गर्न, जनभावनाको कदर गर्न गठबन्धन अनिवार्य छ । आजको यो सबै कार्यभार पूरा गर्न नेकपा एकीकृत समाजवादी पार्टीलाई पुनर्गठित र पुनर्जागृत गरेर अगाडि बढ्नु आजको आवश्यकता हो ।

बजारमा केही दिनदेखि हामीहरूका बारेमा केही भ्रामक समाचार÷विचार आएको देख्छु । यो कुरा गलत हो । देशैभरिका हाम्रा सहयोद्धा साथीहरू यस्ता कुनै पनि भ्रममा नपर्न र आफ्नो कार्यक्षेत्रमा सक्रिय हुनसमेत अनुरोध गर्न चाहान्छु । 

आज हाम्रो पार्टीको दर्ता गरेको दिन हो । यो अवसरमा सबै कमरेडहरू, साथीहरूप्रति हार्दिक शुभकामना ।