प्रमुख सत्तारुढ दल नेपाली कांग्रेसले प्रधानमन्त्री र मन्त्रीहरू आफ्नो निर्वाचन क्षेत्रभन्दा अन्यत्र निर्वाचन प्रचारका लागि जान नपाउने प्रस्तावित आचारसंहिताप्रति आपत्ति जनाएको छ । निर्वाचन आयोगले गरेको प्रधानमन्त्री तथा मन्त्रीहरू निर्वाचन प्रचारका लागि अन्यत्र जान नपाउने प्रस्तावको कांग्रेसले विरोध गरेको हो । 

आयोगले सोमवार आयोजना गरेको छलफलमा कांग्रेसका सहमहामन्त्री जीवन परियारले आयोगले आचारसंहितामा गरेको प्रस्ताव अव्यवहारिक भएको बताए । छलफलपछि सञ्चारकर्मीहरूलाई प्रतिक्रिया दिँदै निर्वाचन प्रचार–प्रसारको क्रममा सामाजिक सञ्जाललाई धेरै बन्देज लगाउनु नहुने सुझाव दिए । उनले नेपाल सरकारका प्रधानमन्त्री, मन्त्रीहरू, प्रदेश सरकारका मुख्यमन्त्री र मन्त्रीहरू आफ्नो निर्वाचन क्षेत्रभन्दा अन्य क्षेत्रमा जान नपाउने भनेर आयोगले ल्याएको प्रावधान अलोकतान्त्रिक, संविधान र कानूनको खिलापमा रहेको भन्दै आफूले ध्यानाकर्षण गराएको उल्लेख गरे । 

‘अन्य कुरामा खर्च गर्नुभन्दा पनि सामाजिक सञ्जालले नै जनताको बीचमा धेरै कुराहरू सम्प्रेषण गर्नसक्छौँ । पार्टीको घोषणापत्र, दर्शन, सिद्धान्तका कुरा सामाजिक सञ्जालबाट बढीभन्दा बढी प्रयोग गर्न सकियो भने उपयुक्त हुन्छ । सामाजिक सञ्जाललाई धेरै बन्देज गर्नु हुँदैन । सामाजिक सञ्जाल दुरुपयोग गर्ने कुरा पनि छन्, त्यसतर्फ आयोगले छानबिन निष्पक्ष रुपमा गर्नुपर्छ’, उनले भने, ‘प्रधानमन्त्री, मन्त्री, मुख्यमन्त्रीहरूले उम्मेदवार भएका व्यक्तिहरू पनि आफ्नो निर्वाचन क्षेत्रभन्दा अन्यत्र जान नपाउने कुरा अलोकतान्त्रिक छ । संविधान र कानूनको खिलापमा छ । मैले गम्भिर रुपमा ध्यानाकर्षण गराएको छु ।’