प्रमुख प्रतिपक्षी दल नेकपा एमालेका अध्यक्ष केपी शर्मा ओली प्रधानमन्त्री शेरबहादुर देउवासँगको भेटका लागि बालुवाटार पुगेका छन् ।

देउवाले फोन गरेर भेट्न बोलाएपछि ओली बालुवाटार गएका हुन् । 

ओलीको सचिवालयका अनुसार देउवाले मंगलवार साँझ फोन गरेर भेट्ने प्रस्ताव गरेका थिए । ‘हिजो साँझ प्रधानमन्त्रीज्यूले भेटौं न भनेर प्रस्ताव गरेपछि अध्यक्षज्यू बालुवाटार जानुभएको हो,’ ओलीको सचिवालयले लोकान्तरसँग भन्यो । 

नागरिकता विधेयक र सत्य निरुपण तथा मेलमिलाप आयोग विधेयक र चुनावी तयारी लगायत समसामयिक विषयमा छलफल भएको स्रोतले बतायो । नागरिकता विधेयक ल्याउँदा र राष्ट्रपतिले पुनर्विचारका लागि फिर्ता पठाएपछि प्रतिनिधि सभाबाट पारित गर्ने विषयमा प्रमुख प्रतिपक्षी दलसँग परामर्श नगरिएको ओलीले गुनासो गर्दै आएका थिए । 

६ महिनापछि ओली बालुवाटार गएका हुन् । अमेरिकी आर्थिक सहयोग कार्यक्रम मिलेनियम च्यालेन्ज कर्पोरेसन (एमसीसी) लाई लिएर सत्ता गठबन्धन अप्ठ्यारोमा परेका बेला चैत्रमा ओली बालुवाटार गएका थिए ।