नेपाल कम्युनिष्ट पार्टी (एकीकृत समाजवादी)का अध्यक्ष माधवकुमार नेपालले राष्ट्रपति विद्यादेवी भण्डारीलाई सैनिक अधिकारीहरूसँग किन भेट गरेको भनी प्रश्न गरेका छन् । बिहीवार पार्टी पुनर्गठनको एक वर्ष पुगेको अवसरमा आयोजित कार्यक्रममा उनले राष्ट्रपतिले सैनिक अधिकारीहरूसँग भेट गर्नुले शंका जन्माएको बताए । 

अध्यक्ष नेपालले राष्ट्रपतिको पछिल्लो कदमले ‘कुनै अनिष्ट हुने हो कि’ भन्ने प्रश्न उठेको बताएका छन् । ‘राष्ट्रपतिले जुन ढंगले पूर्वसैनिक अधिकारीहरूलाई बोलाएर निवासमा भोजन, डिनर दिने कामहरू भयो यसले शंका जन्माएको छ । के गर्न खोजेका छन् राष्ट्रपतिले ? भन्ने प्रश्न खडा भएको छ’, उनले भने, ‘भोलि कतै अनिष्ट त हुने होइन ? भन्ने प्रश्नहरु पनि खडा भएको छ ।’ 

अध्यक्ष नेपालले राष्ट्रपति र नेपाली सेनाका अधिकारीहरुको बीचमा भएको भेटवार्ताको सम्बन्धमा गठबन्धनमा पनि छलफल भएको जानकारी दिएका छन् । ‘आज बिहान बालुवाटारमा हाम्रो बीचमा छलफल पनि भएको छ । हामीले राष्ट्रिय राजनीतिका यी सबै पक्षहरूको बारेमा निगरानी गरिरहेका छौँ । प्रतिगामी शक्तिहरू, दरबारवादी शक्तिहरू, राजतन्त्रवादी शक्तिहरू, विदेशीहरूको दलाली गर्ने शक्तिहरू नेपालको राजनीतिमा कत्तिको क्रियाशील छन्, यी सबै कुरामा पनि हाम्रो नजर छ’, उनले भने ।