चलचित्र ‘छड्के २’मा अभिनेता अनमोल केसी डरलाग्दो लुक्समा प्रस्तुत भएका छन् । निर्माण टिमले शनिवार एक पोष्टरमार्फत अनमोलको क्यारेक्टर लुक्स सार्वजनिक गरेको छ, जहाँ उनले कपाल पालेका छन् भने शरीरभरि अनौठो किसिमको ट्याटु खोपेका छन् ।

‘२.० छड्के’ शीर्षकसहित जारी पोष्टरमा अनमोलले मुखमा चुरोट लिएका छन् भने हालमा रगत लागेको हतियार देख्न सकिन्छ । उनी ‘एंग्री लुक्स’मा छन् । उनको लुक्सले दर्शकलाई चलचित्रप्रति कौतुहलता जगाउन सक्छ । चलचित्रमा अनमोल ग्याङस्टरको भूमिकामा रहेको अनुमान पनि सार्वजनिक लुक्सबाट लगाउन सकिन्छ । फेसबुकमा पोष्टर सार्वजनिक गर्दै अभिनेता अनमोलले ‘पागलपन भर्खरै शुरु भएको’ उल्लेख गरेका छन् । 

निगम श्रेष्ठको लेखन एवं निर्देशन रहेको चलचित्रको अहिले चितवनमा छायांकन भइरहेको छ । चितवनपछि मनाङमा छायांकन हुने यस चलचित्रमा रविन तामाङ र कमलमणी नेपालको समेत मुख्य भूमिका छ । 

काभ्रे फिल्मस्को ब्यानरमा निर्माण भइरहेको चलचित्रमा निर्भाना फिल्म स्कुल र लक्ष्मण काफ्ले कार्यकारी निर्माताको रूपमा छन् । चलचित्रको निर्माता प्रशान्त गिरी र देवकुमार श्रेष्ठ हुन् । 

चलचित्रको मुख्य अभिनेत्री भने अहिलेसम्म सार्वजनिक गरिएको छैन । २०१३ मा रिलिज भएको ‘छड्के’मा सौगात मल्ल, नम्रता श्रेष्ठ, रविन तामाङ, अर्पण थापा, दयाहाङ राई, विपिन कार्कीलगायतको अभिनय थियो ।