नेपाल बार एसोसिएसनले प्रधानन्यायाधीश चोलेन्द्रशमशेर राणाविरुद्ध ३५ बुँदे तथ्यसहितको प्रमाण संसदको महाभियोग सिफारिस समितिलाई बुझाएको छ । बारले प्रतिवादी इच्छाराज तामाङसहितको मुद्दामा अधिवक्ता रुद्र पोखरेलले प्रस्ताव गरेको घुस डिलको अडियोलाई प्रमाणको रूपमा पेश गरेको छ । 

आर्थिक अनियमितता गर्नका लागि जबराले पोखरेलसँग ७६ पटक फोन सम्वाद गरिएको तथ्य पेस गरिएको छ । सर्वोच्च अदालतको भवन निर्माणका लागि जबरा आफैँले हस्ताक्षर गरेर दिएको ठेक्का, राणाकै अगुवाई र नेतृत्वमा अन्य बेन्चहरूलाई ‘बेन्च शपिङ’ गरी चरम आर्थिक अनियमितता गराएको उल्लेख छ ।

त्यस्तै बारले कृष्णमान सिंह पुनरावेदक वादी र हंसमन सिंहको मुद्दा सकार गर्ने प्रकाशमान सिंहसमेत प्रत्यर्थी प्रतिवादी भएको मुद्दाका पक्षहरू तथा प्रधानन्यायाधीश राणा र उनका भाइ प्रभुशमशेर राणाबीच भएको फोनको कल डिटेलसमेत बुझ्न माग गरेको छ ।

सर्वोच्च अदालतका न्यायाधीश मनोजकुमार शर्मा र उच्च अदालत जुम्लाका न्यायाधीश नवराज थपलियाबीच प्रधानन्यायाधीश राणाबाट मुद्दा फैसला गराउने सम्बन्धमा पटक–पटका भए गरेका सम्वादमार्फत अनियमितता गरिएको आरोप लगाइएको छ । उक्त विषयमा सर्वोच्चका न्यायाधीश तीलप्रसाद श्रेष्ठद्वारा छानबिन भइरहेकोले ती सम्पूर्ण कल डिटेल र सम्वादमा संलग्न न्यायाधीशहरूलाई बुझी प्रमाणमा लगाई पाउन माग गरिएको छ ।