नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले यसपटक टिकट वितरणमा अनौठो घटना नहुने बताएका छन् । स्थानीय तहको निर्वाचनमा जस्तो पार्टीभित्र टिकट वितरणमा अनौठो घटना नहुने उनको भनाइ छ । सोमवार काठमाडौंमा आयोजित पार्टीको कार्यक्रमलाई सम्बोधन गर्दै उनले माओवादी केन्द्रले प्रत्यक्षतर्फ प्रतिनिधि सभामा ६० सिट र प्रदेश सभा सदस्यमा १२० सिट दाबी गर्ने बताए । 

‘अरु पार्टीमा भन्दा हाम्रो पार्टीमा स्थानीय तहको निर्वाचनमा कमै मात्र त्यस्ता घटना भए । हाम्रो पार्टीमा पनि अनौठा घटना भए । कोही बाइकबाटै टिकट सोरेर लगेर अर्कैलाई दिने घटना भए । कोही स्थानमा पार्टीले अर्को भनेको छ, अर्कै मान्छे गएर दर्ता गरेको छ’, उनले भने, ‘तर प्रदेश र संघमा त्यस्तो हुँदैन । त्यस्तो हुन दिइँदैन । हामीले प्रत्यक्षमा प्रतिनिधि सभामा ६० सिट भन्दा घटन सकिँदैन, त्यस्तै १२० प्रदेश सभामा हाम्रो दाबी रहन्छ ।’

उनले गठबन्धन रहने कि नरहने भन्ने बारेमा अहिले बहस चलिरहेको भन्दै यही गठबन्धनबाट आगामी निर्वाचन लड्ने प्रतिबद्धता जनाए । प्रचण्डले एमालेप्रति लक्षित गर्दै प्रतिगमनकारी प्रवृत्ति परास्त नभएसम्म गठबन्धन रहिरहने दाबी गरे । उनले यही गठबन्धनको आधारमा प्रतिगमनलाई परास्त गर्ने अभियानलाई निरन्तर अघि बढाउने भन्दै तत्काल अर्को गठबन्धन बन्ने सम्भावना नरहेको जिकिर गरे । 

‘अहिले पनि कयौँ साथीहरूलाई यो गठबन्धन रहन्छ कि अर्को वाम गठबन्धन बन्ने हो कि के हो भन्नेजस्तो प्रश्न बेलाबेलामा आएका छन् । ढुक्क हुनुस्, जबसम्म प्रतिगमनकारी प्रवृत्ति परास्त हुँदैन तबसम्म गठबन्धन रहिरहन्छ । यही गठबन्धनको आधारमा नै हामी निर्वाचनमा जान्छौँ’, उनले भने, ‘यसैको आधारमा हामीले प्रतिगमनलाई परास्त गर्ने अभियानलाई निरन्तर अघि बढाउँछौ । अर्को गठबन्धन बन्न सम्भव छैन । कम्युनिष्ट एकता गरेको तीन वर्ष पुग्दा नपुग्दै विभिन्न छलछाम र षड्यन्त्र भएपछि हामी क्रान्तिकारीहरू त्यस प्रतिगमनका बिरुद्ध आन्दोलनमा उत्रिएका थियाैँ ।’ 

उनले तत्कालीन नेकपा रहँदा आफूहरूबिरुद्ध षड्यन्त्र भएपछि १९ पृष्ठ लामो दस्तावेजसहितको राजनैतिक बम नेकपा सचिवालयमा वर्षाएको बताए । उनले भने, ‘हामीले हेड क्वार्टरमा बम वर्षाको नै हो । १९ पृष्ठ लामो दस्ताबेज मैले ड्राफ्ट गरेर नेकपाको सचिवालयमा प्रस्तुत गरेँ, त्यो साँच्चै राजनैतिक बम जस्तै थियो ।’