नेकपा एकीकृत समाजवादीले रूपन्देही क्षेत्र नम्बर १ र पाल्पा क्षेत्र नम्बर २ बाट आउँदो निर्वाचनको लागि उम्मेदवार सिफारिस गरेको छ । रूपन्देही क्षेत्र नम्बर १ बाट पार्टीका महासचिव बेदुराम भुसाल र उपमहासचिव विजय पौडेललाई सिफारिस गरिएको छ । पार्टी क्षेत्रीय कमिटीको बैठकले भुसाल र पौडेलसँगै जिल्ला नेता उमापति पाण्डेलाई तेस्रो नम्बरमा नाम राखेर सिफारिस गरिएको पार्टीका केन्द्रीय सदस्य सिद्धिचरण भट्टराईले लोकान्तरलाई जानकारी दिए ।

त्यस्तै पाल्पा क्षेत्र नम्बर २ बाट नेकपा एकीकृत समाजवादीका प्रदेश अध्यक्ष सोमप्रसाद पाण्डे उम्मेदवारको लागि सिफारिस भएका छन् । पार्टीको तानसेनमा सम्पन्न जिल्ला सचिवालय बैठकले पाण्डेले सर्वसम्मत रूपमा उम्मेदवारको रुपमा सिफारिस गरेको प्रचार विभाग प्रमुख पदम गैरेले जानकारी दिए । 

पाण्डे अहिले पनि पाल्पा क्षेत्र नम्बर २ बाट प्रतिनिधिसभा सदस्य छन् । उनी पार्टीको पोलिटव्यूरो सदस्य पनि हुन् । नेकपा एमालेबाट पाण्डे २०५१, २०५६, २०७० र २०७४ मा पाल्पा–२ बाट निर्वाचित भइसकेका छन् । एमाले विभाजपछि उनी नेकपा एकीकृत समाजवादीमा लागेका हुन् । 

२०६४ को संविधानसभा सदस्यमा उनी माओवादी उम्मेदवारसँग पराजित भएका थिए । उनी पाल्पा क्षेत्र–२ मा सत्ता गठबन्धनको तर्फबाट पनि बलियो दाबेदार हुन् । यद्यपि गठबन्धनको तर्फबाट भने उनी साझा उम्मेदवार बनिसकेका छैनन् । 

रुपन्देही २ मा कांग्रेसले बलियो दाबी प्रस्तुत गरिरहेको बेला नेकपा एसले निर्वाचन क्षेत्र १ मा चाँडै उम्मेदवारको टुंगो लगाएको छ । नेकपा एसले क्षेत्र नम्बर १ मा आफूहरूको दाबी रहेको सन्देश दिन चाँडै उम्मेदवार टुंगो लगाइएको चर्चा चल्न थालेको छ । 

रूपन्देही क्षेत्र नम्बर १ यस अगाडि नेकपा एमालेका सचिव छविलाल विश्वकर्मा निर्वाचित भएका थिए । रूपन्देही क्षेत्र नम्बर २ बाट नेकपा एसका युवा नेता राजु गुरूङले गठबन्धनमा दाबी गर्दै आएका छन् । तर, क्षेत्र नम्बर २ कांग्रेसले दाबी प्रस्तुत गर्दै आएको छ ।