नेपाल विद्युत् प्राधिकरणको रत्नपार्कस्थित केन्द्रीय कार्यालयमा स्थापना भएको चार्जिङ स्टेसन उद्घाटन गरिएको छ । ऊर्जा जलस्रोत तथा सिँचाइमन्त्री पम्फा भुसालले मंगलवार चार्जिङ स्टेशनको उद्घाटन गरेकी हुन् । प्राधिकरणले पहिलो चरणमा कुल ५१ वटा चार्जिङ स्टेसनको जडानको काम गरिरहेको छ । चार्जिङ स्टेसन सञ्चालनमा आएसँगै विद्युत् खपतमा थप सहयोग पुग्ने प्राधिकरणले जनाएको छ । 

प्राधिकरणका कार्यकारी निर्देशक कुलमान घिसिङले निजी क्षेत्रले सञ्चालन गरेका चार्जिङ स्टेसनको चार्ज शुल्क नियन्त्रण गर्ने बताए । रत्नपार्कको चार्जिङ स्टेसन उद्घाटन कार्यक्रममा बोल्दै उनले निजी क्षेत्रका चार्जिङ स्टेशनले १५ रुपैयाँसम्म चार्ज शुल्क लिने गरेको पाइएकोले बताए । उनले निजी क्षेत्रलाई पनि प्राधिकरणले तोकेबमोजिमको मात्र शुल्क लिन आग्रह गरे । 

कार्यकारी निर्देशक घिसिङले देशभर ५१ वटा चार्जिङ स्टेसन बनाउने तयारीमा लागेको जानकारी दिएका छन् । उनले देशका विभिन्न क्षेत्रमा विद्युतीय चार्जिङ स्टेसन बनाउनको लागि प्राधिकरणले निजी क्षेत्रलाई पनि सहमति दिने बताए । घिसिङले निजी क्षेत्रले बनाएका स्टेसनमा प्राधिकरणले भन्दा २० प्रतिशत थप गरेर शुल्क लिन पाउने पनि बताए । 

उनले रत्नपार्कको चार्जिङ स्टेशन १२० किलोवाट डिसि क्षमता रहेको जानकारी दिएका छन् । घिसिङले  विद्युतीय सवारी एक घण्टाभित्र पूर्णरूपमा चार्ज गर्न सकिने बताए । उनले चार्जिङ स्टेसनमा विद्युतीय सवारी चार्ज गर्दा औसत प्रतिकिलोमिटरमा ७० पैसा लाग्ने बताए । घिसिङले माइक्रोबसमा ९० पैसा र ठूला बसहरूमा १ रुपैयाँ २० पैसा लाग्ने बताए । 

उनले चार्जिङ स्टेसनमा समयअनुसार फरक–फरक हुने बताउँदै राति पिक समयमा ८ रुपैयाँ ७० पैसा र रातिको समयमा ५ रुपैयाँ ५ पैसा तथा बिहानदेखि दिउँसो चार्ज गर्दा ६ रुपैयाँ ९० पैसा निर्धारण गरिएको बताए । 

कार्यकारी निर्देशक घिसिङले विद्युतीय सवारीको सञ्चालन खर्च पेट्रोलियम पदार्थबाट चल्ने गाडीभन्दा १५ गुनाभन्दा धेरै सस्तो हुने दाबी गरे । विद्युतीय बस तथा माइक्रोबसको चार्जिङ सस्तो भएपछि भाडा पनि सस्तो हुनुपर्ने भन्दै अहिले महँगो रहेको भाडालाई पनि नियन्त्रण गर्ने बताए । उनले विगतमा विद्युतीय चार्जिङ स्टेसनको कुरा सोच्न पनि नसक्ने अवस्थामा रहेको तर अहिले चार्जिङ स्टेसन बनाउने अवस्थामा आउनु विद्युतीय क्षेत्रमा ठूलो परिर्वतन भएको बताए । 

उनले निजी क्षेत्रले राखेको चार्जिङ स्टेसनहरू अनियन्त्रित रहेकोमा चिन्ता जनाए । ‘अहिले निजी क्षेत्रले धेरै ठाउँमा राखेका चार्जिङ स्टेसनहरू अनियन्त्रित छन् । बढी नै शुल्क लिएको छ । १५ रुपैयाँ लिदाँ पनि १५ गुणा नै अन्यभन्दा सस्तो छ । तर त्यो शुल्कलाई  नियन्त्रण गर्छौं । प्राधिकरणले सस्तोमा दिएपछि सस्तोमा दिनुपर्छ । विद्युतीय बस तथा माइक्रोबसको चार्जिङ सस्तो भएपछि भाडा पनि सस्तो हुनुपर्छ । भाडा पनि एउटै राखेको पाएका छौँ । विद्युतीय सवारीमा चढेको भाडा पनि सस्तो हुनुपर्छ । विस्तारै त्यसलाई पनि नियन्त्रण गर्छौँ’, उनले भने । 

प्राधिकरणले देशभरका राजमार्ग र मुख्य शहरका बसपार्क, सार्वजनिक जग्गालगायतका स्थानमा चार्जिङ स्टेसन जडान गर्न लागेको बताएको । विद्युत् खपत प्रबद्र्धन गर्नका लागि विद्युतीय सवारीको प्रयोगलाई बढावा दिने उद्देश्यले देशका प्रमुख शहर तथा राजमार्गहरूमा द्रुत सवारी चार्जिङ स्टेसनको स्थापना गर्ने अभियानमा प्राधिकरण रहेको छ । प्राधिकरणले नेपालमै पहिलो पटक सरकारी तहबाट विद्युतीय गाडी चार्ज गर्नका लागि स्टेसन सञ्चालनमा ल्याएको हो । चार्जिङ स्टेसनमा एकै पटक ३ वटा सवारी चार्ज गर्न मिल्नेछ ।