रुपन्देहीको बुटवल उपमहानगरपालिका–१३ बेलबासमा सवारीसाधन दुर्घटनामा परेर बुवाछोराको मृत्यु भएको छ ।

मृत्यु हुनेमा बुटवल उपमहानगरपालिका–१३ बेलवासका ४५ वर्षीय सोनु भट्टराई र उनका ५ वर्षीय छोरा निशान भट्टराई रहेका ईलाका प्रहरी कार्यालय बुटवलका प्रमुख ठगबहादुर केसीले जानकारी दिए ।

बुधवार बुटवल–१३ बेलवासचोकमा पूर्वपश्चिम राजमार्गमा पूर्वबाट पश्चिमतर्फ आउँदै गरेको लु४१प ४१६८ नम्बरको मोटरसाइकल र विपरीत दिशाबाट आउँदै गरेको लु४८प ३२४६ नम्बरको मोटरसाइकल एकआपसमा ठोक्किँदा पश्चिमबाट पूर्वतर्फ जाँदै गरेको लु१क ४४२४ नम्बरको ट्यांकरमुनि लु४१प ४१६८ नम्बरको मोटरसाइकल परेको थियो ।

दुर्घटनाबाट गम्भीर घाइते बुवाछोरालाई उपचारका लागि लुम्बिनी प्रादेशिक अस्पतालमा लगिएकोमा अस्पतालले मृत घोषणा गरेको थियो । दुर्घटनामा बुटवल–१३ का १५ वर्षीय आयुष आचार्य र पाल्पाको रामपुर–२ का २३ वर्षीय अमृत सुनारी मगर घाइते भएका छन् । उनीहरूको लुम्बिनी प्रादेशिक अस्पतालमा उपचार भइरहेको छ ।

दुवै मोटरसाइकल र ट्यांकर प्रहरी नियन्त्रणमा रहेका छन् ।