शुक्रवारदेखि हलमा दुई नेपाली चलचित्र प्रदर्शनमा आउँदैछन्, ‘झिंगेदाउ’ र ‘सम्हालिन्छ कहिले मन’ । जसमध्ये एक दशकअघिको हिट गीतलाई लिएर ‘सम्हालिन्छ कहिले मन’ निर्माण गरिएको हो, जुन प्रेमकथानक चलचित्र भएको जोकोहीले सहजै अनुमान लगाउन सक्छन् । अर्को चलचित्र ‘झिँगेदाउ’ भने साहित्यकार भीमनिधि तिवारीको कथा कृतिमा आधारित रहेर निर्माण गरिएको हो । तर, यसको टाइटल ‘झिंगेदाउ’ भनेको के हो भन्नेबारे भने धेरै जानकार नहुन सक्छन् । ‘झिंगेदाउ’ पुरानो एक खेल हो, जुन समयसँगै यतिबेला हराइसकेको छ ।

पहिले–पहिले नेपाली समाजमा खेलिने विविध खेलमध्ये एक रोचक खेल हो, ‘झिंगेदाउ’ । यो एक जुवा प्रकृतिको खेल हो, जसमा खेलाडीहरूले खालमा सिक्का पैसा थाप्ने र हार–जितको लागि झिंगालाई पर्खेर बस्नु पर्ने हुन्छ । झिंगा आफ्नो मनमौजी पारामा इच्छा लागेको समयमा कुनै एक सिक्कामा गएर गएर बसिदिँदा खेलमा जित–हारको निर्णय हुन्छ । 

झिंगाको पर्खाइ, उसको चाल–ढाल, उसको उडानले खेलमा मनोरञ्जन र रोचकता पैदा गर्छ र समय पनि सजिलै कट्छ । 

प्रविधिको विकास भएपश्चात मानिसहरूले रेडियो, टेलिभिजनलगायतबाट आफूले चाहेअनुसारको मनोरञ्जन प्राप्त गर्न थाले । समयसँगै यो खेल विस्तारै लोप हुँदै गयो । अहिले अधिकांश नेपालीहरूलाई यो खेलको बारेमा जानकारी छैन । साहित्यकार भिमनीधि तिवारीले ‘झिंगेदाउ’ खेललाई आधार बनाएर तत्कालीन नेपाली समाजको चित्रण हुने गरी सोही शीर्षकमा एउटा रोचक कथा रचना गरेका थिए । 

सो कथा नेपाली भाषा प्रकाशिनी समितिले वि.स. २००८ साल कात्तिकमा ‘नेपाली सामाजिक कहानी–अन्तरे भाग)मा प्रकाशित गरेको थियो । सोही कथामा आधारित रहेर यतिबेला पुराना निर्देशक ज्ञानेन्द्र देउजाले फिल्म ‘झिंगेदाउ’ निर्माण गरेका हुन् । 

फिल्ममा केकी अधिकारी, मुकुन भुसाल, आँचल शर्मा, कुशल विष्ट, हिउँवाल गौतम, विजय देउजा, अंशु थापालगायतको मुख्य भूमिका छ । बुधवार गरिएको प्रिमियरमा ‘झिँगेदाउ’लाई अग्र्यानिक कथामा बनेको पारिवारिक फिल्म भनेर धेरैले प्रशंसा गरेका छन् ।