राष्ट्रपति विद्यादेवी भण्डारीले पुनर्विचारका लागि पठाएको नेपाल नागरिकता (पहिलो संशोधन) विधेयक २०७९ प्रमाणीकरणको लागि पुनः राष्ट्रपतिकोमा पठाउने तयारी भएको छ । सभामुख अग्नि सापकोटाले प्रमाणित गरेर सोमवार नै राष्ट्रपतिकोमा पठाउने तयारी भएको हाे । संघीय संसद सचिवालयका प्रवक्ता रोजनाथ पाण्डेले विधेयक आजै राष्ट्रपतिकोमा पठाउने तयारी रहेको लोकान्तरलाई जानकारी दिए ।

प्रतिनिधि सभाबाट भदौ २ गते जस्ताको तस्तै पारित गरिएको नागरिकता विधेयक राष्ट्रिय सभाले पनि जस्ताको तस्तै पारित गरेर प्रतिनिधि सभालाई पठाएको थियो । आइतवारको बैठकमा राष्ट्रिय सभाबाट पारित विधेयकको सन्देश सुनाइएको थियो । ‘सोमवार नै राष्ट्रपतिकोमा पठाउने तयारी छ’ पाण्डेले लोकान्तरसँग भने ।

१५ बुँदे सन्देशसहित राष्ट्रपति भण्डारीले साउन २९ गते प्रतिनिधि सभामा विधेयक फिर्ता पठाएकी थिइन । संघीय संसदका दुवै सदनले पुनर्विचार आवश्यक नभएको भन्दै पारित गरेका विधेयक प्रमाणीकरण गर्नु राष्ट्रपतिका लागि बाध्यकारी छ । 

दोस्रो पटक पुनर्विचारका लागि पठाउने व्यवस्था नरहेकोले प्रमाणीकरण गर्नु या राजीनामा गर्नु राष्ट्रपतिसँग दुई मात्र विकल्प हुनेछ । यसअघि संविधानविदहरूसँगको कुराकानीमा भण्डारीले यो विधेयक प्रमाणीकरण गर्नुभन्दा राजीनामा गर्छु भनेको चर्चा चलेको थियो । 

प्रतिनिधि सभाले विधेयक हुबहु पारित गरेपछि नेपाली, कांगेस, नेकपा एमाले, माओवादी केन्द्रलगायत दलका नेतासँग भण्डारीले परामर्श गरेकी थिइन् । राजनीतिक दलका नेताहरूसँगको कुराकानीमा भने भण्डारीले राजीनामाको कुरा हल्लामात्र भएको बताएकी थिइन् ।