नेकपा एमालेका वरिष्ठ उपाध्यक्ष ईश्वर पोखरेलले निलम्बित प्रधानन्यायाधीश चोलेन्द्रशमसेर जबराको बयान सत्ता गठबन्धनको घिनलाग्दो नौटंकी भएको बताएका छन् । मंगलवार संसद् भवन बाहिर पत्रकारहरुसँग कुराकानी गर्दै उनले महाभियोग लगाएको ६ महिनासम्म चुपचाप बसेर अहिले बयानको नाटक रचिएको बताएका हुन् । 

‘प्रधानन्यायाधीश चोलेन्द्रसमशेर जबराको बयान अहिलेको सत्तागठबन्धनको घिनलाग्दो नौटङ्कीको नयाँ च्याप्टर प्रदर्शन भएको छ । प्रधानन्यायाधीशको विषयमा महाअभियोग लगाएपछि सरकारले नियमअनुसार प्रक्रिया अगाडि बढाउनु पर्ने थियो’, वरिष्ठ उपाध्यक्ष पोखरेलले भने, ‘तर सरकारले बहुमतको आडमा त्यो काम गरेन । अहिले प्रधानन्यायाधीशको विषयमा काम भइरहेको छ त्यो झारा टार्ने काम गरिएको छ । प्रधानन्यायाधीशलाई महाअभियोग लगाएर ६ महिनासम्म प्रक्रिया अगाडि नबढाउनु गठबन्धनका धेरै अपराधमध्येको यो पनि एउटा हो ।’