नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले संसदको अन्तिम बैठकमा पनि आफूले गरेको संसद् विघटनको बचाउ गरेका छन् । 

प्रतिनिधि सभाको अन्तिम बैठकलाई शनिवार सम्बोधन गर्दै उनले संसद् विघटनको सिफारिस गर्दा आफूलाई प्रतिगमन गरेको भनेर लगाएको आरोपको समेत खण्डन गरेका छन् । प्रतिनिधि सभाको कार्यकाल आज मध्यरातिबाट सकिँदै छ । 

प्रधानमन्त्री शेरबहादुर देउवालाई प्रश्न गर्दै ओलीले भने, ‘अहिले सरकारले चुनाव घोषणा गरेको र आजबाट संसद्को म्याद सकिँदै छ । त्यसो हो भने तपाईंले पनि प्रतिगमन गर्दै हुनुहुन्छ । अवस्था त्यस्तो हो ?’

‘निर्वाचनमा जाने कुरालाई प्रतिगमन भनिँदैन । असंवैधानिक ढंगले नक्कली सरकार गठन गर्नु चाहिँ प्रतिगमन हो । निर्वाचनमा जाने कुरा पहिले पनि प्रतिगमन होइन । अहिले पनि प्रतिगमन होइन’, ओलीले भने । 

आफूले घोषणा गरेको मितिमा चुनाव हुन पाएको भए वैशाख १७ र २७ मा चुनाव भइसक्ने र अहिले नयाँ जनादेशको संसद् रहेको अवस्था हुने ओलीले बताए । 

प्रतिनिधि सभामा शुरुमा बोलेका प्रधानमन्त्री शेरबहादुर देउवाले ओलीले आफ्नो सम्बोधनमा ‘परमादेशको सरकार’ भन्न सक्ने भन्दै अहिलेको सरकारको परमादेशकै आधारमा बनेको बताएका थिए । 

‘अदालतले परमादेश नदिएको भए अहिले हामी सँगै हुने थिएनौँ । सँगै काम गर्ने अवस्था हुँदैनथ्यो’, प्रधानमन्त्री देउवाले भनेका थिए ।