अर्थमन्त्री जनार्दन शर्माले बाह्य देशको उत्पादन ल्याएर नेपालमा बिक्री वितरण मात्र गर्ने परिपाटीले देश समृद्ध बन्न नसक्ने बताएका छन् ।

लिगलिग पालुङटार उद्योग वाणिज्य संघ पालुङटार नगरपालिकाको आयोजनामा गोरखामा बुधवारदेखि शुरू भएको ‘लिगलिग पालुङटार महोत्सव २०७९’को उद्घाटन कार्यक्रममा उनले आफ्नो देशका लागि आफैं उत्पादन गर्ने र अरुका बाह्य देशमा पुर्‍याउन सक्ने व्यवसायले मात्र देश छिट्टै समृद्ध बन्ने बताए ।

‘हामीले अहिले गरिरहेको धेरैजसो व्यवसाय बाहिरबाट ल्याएर गर्ने गरेका छौं,’ उनले भने, ‘उत्पादन हामी आफैं उपयोग गर्ने, अरुकोमा पुर्‍याउने खालको व्यवसाय हामीलाई आज आवश्यक छ ।’

अर्थमन्त्री शर्माले त्यसका लागि देशमा हरेक खालका व्यवसायलाई आर्थिक उत्पादनसँग जोडेर शहरीकरण गर्न सक्यौं भने मात्र वास्तविक विकास हुने उनको भनाइ छ । अर्थमन्त्री शर्माले विकासबाट जनताको आर्थिक जीवनमा सांस्कृतिक जीवनमा परिवर्तन गर्न सक्नुपर्ने बताए ।

उनले अबको विकासको मान्यता आर्थिक सामाजिक र सांस्कृतिक रूपमा जनताको जीवनलाई बदल्न सक्ने खालको हुनुपर्ने बताए । अर्थमन्त्री शर्माले उत्पादन जोडेर विकास निर्माणलाई अगाडि बढाउँदा पनि संस्कृति, अर्थतन्त्र र सामाजिक वातावरण निर्माण गर्ने कुरामा ध्यान पुर्‍याउन सके यसले समग्र विकासलाई जोड्ने सक्ने उल्लेख गरेका छन् ।

संविधानले सामाजिक न्याय सहितको समाजवादको आधार तयार गर्ने स्पष्ट किटान गरेको भन्दै उनले गरीबीको अन्त्य र समानताको वातावरण निर्माण गर्न जनताको न्यूनतम आवश्यकता परिपूर्ति गर्ने क्षमता सरकारले बताउनुपर्ने अहिलेको अवस्था रहेको बताए ।