विवेकशील साझा पार्टीका निवर्तमान अध्यक्ष रविन्द्र मिश्र राष्ट्रिय प्रजातन्त्र पार्टी (राप्रपा) प्रवेश गर्ने भएका छन् । 

विवेकशील साझा पार्टीको अध्यक्षबाट राजीनामा दिएर बसेका मिश्रले सोमवार पार्टीको साधारण सदस्य पनि नरहने गरी राजीनामा दिएका थिए ।

मिश्रले राप्रपाको सहअध्यक्ष माग गरेका थिए । राप्रपा नेतृत्व त्यसका लागि तयार भएपछि मिश्र आफ्ना केही समर्थक लिएर राप्रपा प्रवेश गर्न लागेका हुन् ।

मिश्र सहितको एउटा समूहलाई राप्रपा प्रवेश गराउनका लागि बुधवार काठमाडौंमा एक विशेष कार्यक्रम आयोजना गरिने राप्रपाका प्रवक्ता मोहन श्रेष्ठले जानकारी दिए ।

राप्रपा प्रवेशसँग मिश्र काठमाडौं–१ बाट प्रतिनिधि सभाको उम्मेदवार बन्ने बताइएको छ । २०७४ सालको चुनावमा मिश्र सोही क्षेत्रका कांग्रेसका प्रकाशमान सिंहसँग पराजित भएका थिए । 

पछिल्लो समय विचारभन्दा माथि देश भन्दै मिश्रले राजतन्त्र पुनःस्थापनाको अभियान चलाइरहेका छन् ।

उनै मिश्रलाई आगामी चुनावमा काठमाडौं क्षेत्र नम्बर १ मा एमालेले सघाउने संकेत गरेको छ । मिश्र र एमाले अध्यक्ष केपी ओलीका बीचमा चुनावी सहकार्यबारे विस्तृतमा कुरा भइसकेको छ । १ महिनाअघि भएको ओली–मिश्र भेटमा सम्भावित सहकार्यबारे सहमति बनेको मिश्रले निकटस्थहरूसँग बताउने गरेका छन् ।