नेकपा एमालेका पूर्वउपाध्यक्ष एवं निवर्तमान सांसद भीम रावलले प्रतिनिधि सभा निर्वाचनका लागि टिकट नदिने पार्टी निर्णयपछि के गर्ने भन्नेबारे कुनै निर्णयमा पुगिनसकेको बताएका छन् । 

पछिल्ला तीनवटा निर्वाचनमा लगातार विजयी भएका रावलले यसपटक टिकट नपाउने निश्चित भइसकेको छ । 

रावलको ठाउँमा माओवादी परित्याग गरेर एमाले प्रवेश गरेका झपट बोहोरा एमालेको उम्मेदवार बन्ने भएका छन् । ‘अछाम १ बाट अरु कसैलाई टिकट दिने निर्णय भएको भन्ने कुरा मैले पनि मिडियाबाट थाहा पाएँ, के कारणले यस्तो भयो भन्नेबारे अध्ययन गर्दैछु’, रावलले शुक्रवार साँझ लोकान्तरसँगभने । 

एमालेले टिकट नदिए रावल स्वतन्त्र उठ्ने चर्चा पनि चलिरहेको छ । ‘टिकट नदिने कुरा त आइसकेको छ, अब के गर्ने भन्नेबारे अहिल्यै निर्णय लिइसकेको छैन, भोलिसम्म कुर्छु’, रावलले भने । मंसिर ४ गते हुने प्रतिनिधि सभा निर्वाचनका लागि आइतवार उम्मेदवारी मनोनयन गर्ने कार्यक्रम छ । 

विगतमा माधव नेपालनिकट भनेर चिनिएका रावलले गतवर्ष चितवनमा भएको एमाले महाधिवेशनमा एमाले अध्यक्षमा केपी ओलीसँग प्रतिष्पर्धा गरेका थिए । 

रावलसहित घनश्याम भुसालले पनि प्रतिनिधि सभाको टिकट नपाउने निश्चित भएको छ । भुसालको रुपन्देही ३ मा एमालेले राप्रपाका दीपक बोहरालाई समर्थन गर्ने भएको छ ।