आगामी मंसिर ४ गते हुने प्रतिनिधि र प्रदेश सभा निर्वाचनका लागि उम्मेदवारी दर्ताको अघिल्लो दिन सभामुख अग्निप्रसाद सापकोटाले सरकारी निवास छाडेका छन् ।

शनिवार मध्यरातिबाट कार्यकाल सकिन लागेका सापकोटाले शनिवार सरकारी निवास छाडेर निजी निवासमा सरेका हुन् । पछिल्लो निर्वाचनका लागि मनोनयन गर्ने अघिल्लो दिनसम्म सभामुखको कार्यकाल बाँकी रहने कानूनी प्रावधान रहेको छ । 

सापकोटाले शनिवारदेखि सभामुखको रूपमा पाउने सरकारी सेवा सुविधा छाडेको उनका प्रेस विज्ञ श्रीधर न्यौपानेले जानकारी दिए । सरकारी सेवा सुविधा छाड्नु अगाडि सापकोटाले सिंहदरबारमा पत्रकार सम्मेलन गरेका थिए । पत्रकार सम्मेलनमार्फत उनले आफूले आगामी निर्वाचनमा उम्मेदवार नबन्ने घोषणा गरेका थिए ।