प्रतिष्पर्धी दलका नेता जिल्ला पुग्दा कांग्रेस छलफलमै, उम्मेदवार छान्न राति अबेरसम्म बैठक

मंसिर ४ गते हुने प्रतिनिधि सभा र प्रदेश सभा निर्वाचनका लागि उम्मेदवार छान्न नेपाली कांग्रेसको बैठक बसिरहेको छ । उम्मेदवार छान्ने आधिकारिक निकाय संसदीय बोर्डको बैठक शनिवार राति अबेरसम्म चलिरहेको छ । 

नेकपा एमालेलगायतका दलले उम्मेदवारको टुंगो लगाएर नेताहरू जिल्लामा पुगिसक्दा कांग्रेस भने छलफलमा व्यस्त छ । अधिकांश क्षेत्रको टिकट वितरण भइसकेको र केही क्षेत्रको मात्र निर्णय गर्न बाँकी रहेको बोर्डका एक सदस्यले जानकारी दिए । 

सुदूरपश्चिम प्रदेश र कर्णाली प्रदेशका उम्मेदवारको टुंगो लागिसकेको कांग्रेसका ती नेताले बताए । शनिवार राति १० बजेसम्म बसिरहेको बैठकमा अन्य प्रदेशको उम्मेदवारको बारेमा छलफल भइरहेको छ । मधेश प्रदेशमा आकांक्षी धेरै भएकोले निर्णय गर्न ढिला भएको नेताहरूले बताएका छन् । 

प्रधानमन्त्री एवं पार्टी सभापति शेरबहादुर देउवा डडेल्धुरा, उपसभापति पूर्णबहादुर खड्का सुर्खेत अर्का उपसभापति धनराज गुरुङ स्याङ्जाबाट उम्मेदवार बन्ने पक्का भएको छ । 

महामन्त्री गगन थापा काठमाडौं ४ र अर्का महामन्त्री विश्वप्रकाश शर्मा झापा १ बाट उम्मेदवार बन्ने भएका छन् । गगन थापा सर्लाही ४ बाट उठ्ने तयारी रहेको भन्दै सोही समूहका नेताहरुले प्रचार गरे पनि गगनले काठमाडौं ४ नछाड्ने भएका हुन् ।

गृहमन्त्री बालकृष्ण खाण रुपन्देही ३ बाट उम्मेदवार बन्ने भएका छन् । गठबन्धनमा सिट बाँडफाँट हिजोमात्र टुंगिएकोले आफ्नो भागमा परेको क्षेत्रमा उम्मेदवार छान्न ढिला भएको कांग्रेस नेताहरूले दाबी गरेका छन् ।

प्रतिनिधि सभा निर्वाचनका लागि भोलि उम्मेदवारी मनोनयन गर्ने कार्यक्रम छ ।