गत शुक्रवारदेखि प्रदर्शनमा आएको फिल्म ‘दुई नम्बरी’ले बक्स अफिसमा सुखद् ब्यापारलाई निरन्तरता दिइरहेको छ । 

रिलिजको पाँचौ दिन मंगलवार पनि फिल्मको ब्यापार उच्च देखिएको छ । 

विशेषगरी देशैभरका मल्टिप्लेक्स हलहरूमा फिल्म हेर्न दर्शकको उच्च ‘अकुपेन्सी’ देखिएको छ । 

फिल्मका निर्माता किरण नेपालीले आफूहरू नाफामा गइसकेको बताएका छन् । 

फिल्मले निर्माताको पोल्टामा राम्रो रकम फिर्ता गर्ने पनि पक्का देखिएको छ । 

‘दुई नम्बरी’बाट राम्रो मुनाफा हुने भएपछि निर्माता किरणले फिल्म निर्माणमा पर्दा पछाडि रहेर दुःख गरेका प्राविधिकहरूलाई बोनस दिने भएका छन् ।

उनले भने, ‘फिल्म निर्माणको समयमा कम पारिश्रमिकमा पनि निक्कै दुःख गरेर काम गर्नुभएका प्राविधिकहरुलाई हामी बोनस दिन्छौं । फिल्म हिट बनाउनमा उहाँहरुको पनि ठूलो हात छ ।’ 

बोनस कति दिने भन्ने अहिले पक्का नभएको उनले बताए ।

फिल्मले गर्ने लाइफ टाइम कलेक्सनको आधारमा बोनस दिने उनले बताए ।

नेपालमा फिल्म हिट भएपछि निक्कै कम मात्र निर्माताले प्राविधिकहरुलाई बोनस दिएका उदाहरण छन् । 

दीपेन्द्र लामाको लेखन तथा निर्देशनमा तयार भएको यो फिल्ममा दयाहाङ राई, सौगात मल्ल, उपासना सिंह ठकुरी, बुद्दि तामाङ, उगेन छोदेनको मुख्य भूमिका छ ।