आगामी मंसिर ४ गते हुने प्रतिनिधि सभा र प्रदेश सभा निर्वाचनका लागि पार्टीको घोषणा पत्रको तयारी गर्न नेकपा एमालेका अध्यक्ष केपी ओली ललितपुरको लाँकुरी भन्ज्याङ पुगेका छन् । घोषणा पत्रको मस्यौदाबारे छलफल गर्न उनी एमालेका केही नेताहरूसहित शनिवार लाँकुरी भन्ज्याङ पुगेका हुन् । ओलीसहितका नेताहरू छलफलका लागि द टेरेसेस रिसोर्टमा पुगेका छन् ।

ओलीसहित महासचिव शंकर पोखरेल, उपमहासचिव विष्णु रिमाल, पुनर्निर्माण प्राधिकरणका पूर्व कार्यकारी निर्देशक सुशील ज्ञवालीलगायतले त्यहाँ बसेर एमालेको घोषणा पत्रको मस्यौदा तयार गर्नेछन् । ओलीले आगामी निर्वाचनको घोषणा पत्रमा समेट्नुपर्ने विषयमा बारेमा सामाजिक सञ्जालमार्फत सुझाव समेत मागेका थिए । 

ओलीसहितको एमाले टोलीले सामाजिक सञ्जालबाट प्राप्त सुझावहरूको पनि अध्ययन गरिरहेको ओलीको सचिवालयले जानकारी दिएको छ । उनीहरूले घोषणा पत्रको मस्यौदा त्यही बसेर बनाउने र त्यसलाई पार्टीभित्र छलफल गरेर अन्तिम टुंगो लगाइने एमालेले जनाएको छ ।