सोमवारबाट २०७९ को आधा वर्ष सकिँदैछ । यो अवधिमा २७ नेपाली चलचित्र प्रदर्शनमा आएका छन् । जसमध्ये व्यवसायिक रूपमा पाँचवटा चलचित्र मात्र सफल भएका छन् । अन्य चलचित्रले विभिन्न स्रोतबाट लगानी उठाए पनि हलबाट लगानी उठाउन सकेनन् । 

वैशाख १ गतेदेखि प्रदर्शनमा आएको चलचित्र ‘ए मेरो हजुर ४’ले हलबाट लगानी सुरक्षित गरेको निर्माण पक्षको भनाइ छ । झरना थापा निर्देशित यो चलचित्रमा अनमोल केसी र सुहाना थापाको मुख्य भूमिका छ । 

वैशाखपछि जेठ १३ गते रिलिज भएको चलचित्र ‘कबड्डी ४’ले नेपालमा अहिलेसम्मकै धेरै कमाई गर्ने चलचित्रको रेकर्ड नै कायम गर्‍यो । रामबाबु गुरुङ निर्देशित उक्त चलचित्रले नेपालमा २३ करोड रुपैयाँ बढी ग्रस कलेक्सन गर्न सफल रह्यो । ‘कबड्डी ४’मा दयाहाङ राई, सौगात मल्ल, मिरुना मगर, गौमाया गुरुङ, बुद्धि तामाङ, विजय बराललगायतको अभिनय छ । 

‘कबड्डी ४’पछिको अर्को हिट चलचित्र हो, ‘झिंगेदाउ’ । ज्ञानेन्द्र देउजा निर्देशित चलचित्रमा केकी अधिकारी, आँचल शर्मा, मुकुन भुषाल, हिउँवाला गौतम, कुशल विष्ट लगायत शीर्ष भूमिकामा छन् । ‘झिंगेदाउ’ अपेक्षाभन्दा राम्रो व्यापार गरेको चलचित्र मानिन्छ । 

त्यस्तै, असोज ७ गतेदेखि प्रदर्शनमा आएको ‘प्रेम गीत ३’ अर्को हिट चलचित्र हो । चलचित्रले तीन सातामा नेपालमा मात्रै १३ करोड बढीको व्यापार गरिसकेको छ । चलचित्रले विश्वभरबाट ३७ करोड रुपैयाँ बढी कलेक्सन गरेको निर्माण टिमको दाबी छ । 

सन्तोष सेनको निर्माण रहेको ‘प्रेम गीत ३’मा प्रदीप खड्का र क्रिष्टिना गुरुङ मुख्य भूमिकामा छन् । चलचित्र यतिबेला चौँथो सातामा प्रदर्शनरत छ । 

त्यस्तै, यसवर्षको अर्को हिट सावित भएको चलचित्र हो, ‘दुई नम्बरी’ । असोज २१ गतेदेखि प्रदर्शनमा आएको चलचित्रले पहिलो साता साढे चार करोड ग्रस कलेक्सन गरेको छ । यतिबेला दोस्रो सातामा प्रदर्शनरत चलचित्रमा दयाहाङ राई, सौगात मल्ल, उपासना सिंह ठकुरी, उगेन छोदेन्, बुद्धि तामाङ लगायतको अभिनय छ । दीपेन्द्र लामाले चलचित्रको लेखन एवं निर्देशन गरेका हुन् । 

यो आधा वर्षमा केही चलचित्रहरूले आशातित व्यापार गर्न सकेनन् । आउँदा दिनमा थुप्रै प्रतिक्षित चलचित्रहरू प्रदर्शनको तयारीमा छन् । ‘के घर के डेरा’, ‘महापुरुष’, ‘लाखे’, ‘परदेशी २’, ‘छक्कापञ्जा ४’ लगायतका अपेक्षित चलचित्रहरू हुन् । वर्षको मध्यसम्म स्टार कलाकारहरूका चलचित्र पनि रिलिज भए । ब्राण्ड नामका चलचित्रहरू समेत रिलिज भए । ब्राण्ड नामका चलचित्रहरूमा प्रायः स्टार कलाकारहरूकै अभिनय रह्यो । सफल चलचित्रहरु हेर्ने हो भने ब्राण्ड नाम नै बढी बिकेको देखियो ।