राष्ट्रिय खेलकुद परिषद्का सदस्य सचिव टंकलाल घिसिङले गण्डकी प्रदेशमा जारी नवौँ राष्ट्रिय खेलकुद प्रतियोगिताले खेलकुद जगतमा नयाँ उभार ल्याएको बताएका छन् । 
म्याग्दीमा सञ्चालित महिला भलिबल र तेक्वान्दो खेल अवलोकनका लागि मंगलबार बेनी पुगेका सदस्य सचिव घिसिङले खेलाडी र दर्शक तथा सरोकारवालाहरुको साथ र सहयोगबाट नवौँ राष्ट्रिय खेलकुद प्रतियोगिता ऐतिहासिक बनेको बताए । 
“राखेपको नेतृत्वमा म आएको ११ महिना भएपनि काम गर्न पाएको जम्मा ७ महिना भएको छ,” उनले भने “छोटो तयारीका बावजुद नवौँ राष्ट्रिय प्रतियोगिता सफलतापूर्वक सम्पन्न गर्दैछौ । खेलाडी र खेलप्रेमीहरुको चाहना पुरा गर्न सफल भएका छौ ।”
सदस्य सचिव घिसिङले अन्तराष्ट्रिय पदक जित्ने नेपाली खेलाडीलाई सम्मान सहित उचित नगदको समेत व्यवस्था गर्न ऐन संसोधन भएको बताए ।  खेलाडीलाई खेल्ने र खेलेर जिवन निर्वाह गर्न पुग्ने किसिमले आर्थिक व्यवस्थापन गर्न राखेपले पहल गरिरहेको उनले बताए ।  
नवौँ राष्ट्रिय खेलमा उत्कृष्ट प्रदर्शन गर्ने खेलाडीलाई राष्ट्रिय टिममा अनुबन्ध गराउने र आगामी वर्ष चिनमा हुने हङकङ च्याम्पियनसिपमा सहभागी हुने व्यवस्था मिलाउने बताए । 

जिल्ला समन्वय समिति, बेनी नगरपालिका लगायत म्याग्दीका स्थानीय तह, प्रशासन र सुरक्षा निकाय तथा समुदाय स्तरबाट खेल सञ्चालनका लागि भएको सक्रियता र सहयोगको उनले प्रशंसा गरे ।