गण्डकी प्रदेशमा जारी नवौँ राष्ट्रिय खेलकुद प्रतियोगिताअन्तर्गत पुरुष भलिबलको स्वर्ण पदक विभागीय टोली एपीएफ क्लबले जितेको छ । पोखरा रंगशालाको कोर्टमा बिहीवार सम्पन्न फाइनल खेलमा एपीएफले अर्को विभागीय प्रतिद्वन्द्वी त्रिभूवन आर्मी क्लबलाई हराउँदै स्वर्ण पदक जितेको हो । पराजित आर्मीले रजत पदकमा चित्त बुझायो ।

प्रतिष्पर्धात्मक हुने अनुमान गरिएको खेलमा एपीएफले आर्मीविरुद्ध ३–० को सोझो सेटमा जित निकालेको हो । यद्यपि, खेल साँघुरो अन्तरको स्कोरमा सकिएको थियो । एपीएफले पहिलो सेट २५–२१ ले आफ्नो पक्षमा पार्न सफल भएको थियो । दोस्रो सेट आर्मी खेलमा फर्किनका लागि निकै प्रयास गरे पनि सफल हुन सकेन । २७–२५ ले पक्षमा पार्दै दोस्रो सेट पनि एपीएफले पोल्टामा पारेको थियो । दुई सेट जितिसकेको एपिएफले तेस्रो सेटमा पनि आर्मीलाई दबाबमा राख्यो । यद्यपि, तेस्रो सेट पनि प्रतिष्पर्धात्मक नै बन्यो । खेलमा फर्किन कोसिस गरेको आर्मीले २४–२६ को स्कोरमा सेट सुम्पिएसँगै स्वर्ण पदक पनि गुमाउन पुग्यो । दुवै टोलीमा राष्ट्रिय खेलाडीको बर्चश्व रहेको थियो ।

यस्तै बिहीवार नै कास्य पदकका लागि भएको प्रतिष्पर्धामा आयोजक गण्डकी प्रदेश अर्को विभागीय टोली नेपाल पुलिस क्लबसँग स्तब्ध हुन पुग्यो । पुलिसले गण्डकी प्रदेशमाथि ३–० को सहज जित निकाल्न सफल भएको थियो । पहिलो सेटमा २६–२४ को कठिन जित निकालेको पुलिसले दोस्रो सेटमा २५–१४ र तेस्रो सेटमा २५–१८ को स्कोर निकाल्न सफल भएको थियो ।

यससँगै एपीएफका दुवै टोलीले भलिबलमा स्वर्ण पदक जितेका छन् । यसअघि बुधवार भएको महिलातर्फको प्रतिष्पर्धामा एपीएफले नेपाल पुलिस क्लबमाथि ३–१ को सेटमा जित निकाल्दै स्वर्ण पदक जितेको थियो भने बागमती प्रदेशले कास्य पदक जितेको थियो ।