नेपाली कांग्रेसका सभापति एवं प्रधानमन्त्री शेरबहादुर देउवाले गठबन्धन गर्नु रहर नभई देशको आवश्यकता रहेको दाबी गरेका छन् । गठबन्धनका कारण टिकट खोसिएकालाई अन्य तरिकाले न्याय गर्ने उनले बताए ।

सत्तारुढ गठबन्धनले सोमवार काठमाडौंमा आयोजना गरेको प्रदेशस्तरीय भेलालाई सम्बोधन गर्दै देउवाले ठूलो लडाइँ लडेर ल्याएको लोकतन्त्र बचाउनको लागि गठबन्धन अपरिहार्य रहेको जिकिर गरेका हुन् ।

‘बाबुरामजीले भनिसक्नु भयो, यो गठबन्धन आवश्यकताले बनेको हो, रहरले बनेको होइन । मलाई प्रधानमन्त्री बनाउनुभएको होइन । गठबन्धनको महत्वको विषयमा अन्य साथीहरूले भनिसक्नु भएको छ, गठबन्धन अपरिहार्य थियो, छ र भोलि पनि रहनेछ’, देउवाले भने । 

देउवाले गठबन्धन गर्दा सबै पार्टीका आकांक्षीले टिकट पाउन नसकेको भन्दै भोलिको दिनमा सबै पार्टीले न्याय गर्ने बताए । ‘यो गठबन्धनलाई टिकाउन गठबन्धनका सबैले एक भएर लागेर गठबन्धनको विजय गराउनु पर्नेछ’, उनले भने । 

संविधानले व्यवस्था गरेको निर्वाचन प्रणालीका कारण कुनै पनि पार्टीको बहुमत आउन नसक्ने भएकोले गठबन्धन अपरिहार्य रहेको उनले दाबी गरे । ‘गठबन्धनको संस्कृति शुरुवात गरेका छौँ, यसलाई अगाडि बढाएको खण्डमा कसैले पनि प्रजातन्त्रको खिलापमा जान सक्ने छैन, समावेशी सुन्दर नेपाल बन्ने छ’, देउवाले भने ।