नेपाली कांग्रेसका संस्थापक नेता बीपी कोइरालाको निवास रहेको विराटनगरलाई कुनै समय नेपालको प्रजातान्त्रिक आन्दोलनको केन्द्रको रूपमा चिन्ने गरिन्थ्यो ।

बीपीपछि गिरिजाप्रसाद कोइरालाले नेपालकै राजनीतिको नेतृत्व गरेका थिए । 

बीपी महत्त्वपूर्ण निर्णय गर्दा कोइराला निवासमै आएर गर्थे । विराटनगरको कोइराला निवासमा जन्मेका गिरिजाप्रसाद ४ पटक प्रधानमन्त्री बने ।

गिरिजाले पनि त्यो परम्परालाई निरन्तरता दिए । महत्त्वपूर्ण घोषणा उनले विराटनगरमै आएर गर्ने गरेका थिए ।

गिरिजाप्रसादपछि भने कोइराला निवासले देशको नेतृत्व गर्ने अवसर पाएको छैन । पटक–पटक विभिन्न आन्दोलनको नेतृत्व गरिरहेको कोइराला निवासले यसपटक २ जना उम्मेदवार पाएको छ ।

कोइराला निवासका डा. शेखर कोइराला र सुजाता कोइराला मोरङबाट उम्मेदवार बनेका छन् । 

चुनाव जित्नका लागि शेखरलाई यसपटक खासै गाह्रो नपर्ने कांग्रेसको आकलन छ । कोइरालाले नेकपा एमालेका उम्मेदवार लालबाबु पण्डितसँग दोस्रोपटक प्रतिस्पर्धा गरिरहेका छन् ।

पण्डितले अघिल्ला चुनावका बेला गरेका प्रतिबद्धता र वाचा मन्त्री भएपछि बिर्सेको आरोप लाग्ने गरेको छ । 

चुनाव हारे पनि कहिले बिरामीको उपचार त कहिले संगठन निर्माण भन्दै शेखरले आफ्नो निर्वाचन क्षेत्र छाडेका छैनन् ।

अघिल्लोपटक वाम गठबन्धन हुँदा शेखर झिनो मतान्तरले पराजित भएका थिए । 

मोरङको ६ नम्बर क्षेत्रमा १ लाख २६ हजार ७६१ मतदाता छन् । ६ नम्बर क्षेत्रमा विराटनगर महानगरपालिकाका ७ वडा, सुन्दरहरैंचा नगरपालिकाका ६ वडा र बुढीगंगा गाउँपालिकाका ७ वडा पर्छन् ।

६ नम्बर क्षेत्रभित्र वडाध्यक्ष पदका उम्मेदवारले पाएको मतका आधारमा कांग्रेसले २७ हजार ८६ र एमालेले २४ हजार ५५६ मत पाएको छ ।

माओवादी केन्द्रका उम्मेदवारले ४ हजार ९९६, जनता समाजवादी पार्टी (जसपा) नेपालका उम्मेदवारले ३ हजार ९३९, राष्ट्रिय प्रजातन्त्र पार्टी (राप्रपा) का उम्मेदवारले ३ हजार ११५, एकीकृत समाजवादीका उम्मेदवारले २ हजार ३५५ र लोकतान्त्रिक समाजवादी पार्टी (लोसपा) नेपालका वडाध्यक्षका उम्मेदवारले ८९५ मत पाएका छन् ।

यतिबेला देशैभर चुनावी समीकरण फेरिएको छ । स्थानीय तह चुनावमा सत्ता गठबन्धनमा रहेको जसपा संघ र प्रदेशको चुनावमा विपक्षी गठबन्धनसँग मिलेको छ ।

एमाले र जसपाको गठबन्धन भए पनि मोरङमा राप्रपासँग गठबन्धन भएको छैन । लोसपा सत्ता गठबन्धनमा छ ।

लोसपाको मतसहित सत्ता गठबन्धनसँग ३५ हजार ३३२ मत छ भने एमाले नेतृत्वको गठबन्धनमा राप्रपाको मत समेत जोड्दा पनि ३१ हजार ६१० मत रहेको देखिन्छ । तर, मोरङमा एमाले र राप्रपाका आ–आफ्नै उम्मेदवार छन् । 

मोरङको २ नम्बर क्षेत्रबाट प्रतिनिधिसभा सदस्य उम्मेदवार बनेकी गिरिजाप्रसाद कोइरालाकी छोरी सुजाता पनि बुवाको राजनीतिक विरासत फर्काउने दाउमा छिन् । 

बुवाले पटक–पटक चुनाव जितेको क्षेत्रबाट उम्मेदवार बनेकी छन्, उनी । अघिल्लोपटक यस क्षेत्रबाट कांग्रेसका मीनेन्द्र रिजालले चुनाव जितेका थिए ।

वाम गठबन्धन हुँदा समेत एक्लै चुनाव जितेका रिजालले यसपटक टिकट पाएनन् । सुजातामाथि ‘पाहुना उम्मेदवार’को आरोप लाग्ने गरेको छ । 

टिकट नपाएपछि रिजाल पनि सुजाताको प्रचारमा खटेका छैनन् । कांग्रेसको बलियो संगठन, माओवादीको मत र एमाले फुटका फाइदा उठाउँदै चुनाव जित्ने रणनीतिमा सुजाता छिन् ।

एमालेले जिल्ला अध्यक्ष ऋषिकेश पोख्रेललाई उम्मेदवार बनाएको छ । उनी अघिल्लोपटक मीनेन्द्रसँग पराजित भएका थिए । अघिल्लोपटक पराजित भएकाले सहानुभूतिको मत पाएर चुनाव जित्ने पोख्रेलको रणनीति छ । 

यस क्षेत्रमा स्थानीय तहको मतका आधारमा सत्ता गठबन्धन नै बलियो देखिन्छ । स्थानीय तह निर्वाचनमा वडाध्यक्षले पाएको मतमा एमालेभन्दा सत्ता गठबन्धन अगाडि छ ।

एमालेले ३१ हजार ३३० मत पाएको छ भने कांग्रेसले २८ हजार ६१७, माओवादी केन्द्रले ७ हजार २७१, राप्रपाले २ हजार ६९, लोसपाले ५६६ र नेकपा एकीकृत समाजवादीले १८० मत पाएको छ ।