प्रतिनिधिसभा तथा प्रदेशसभाको निर्वाचन (मंसिर ४) आउन ३ साताभन्दा पनि कम समय बाँकी छ । तर, चुनावलाई लिएर मतदाताहरूमा खासै उत्साह पाइँदैन ।

१८ गतेबाट मात्र खुलेर चुनाव प्रचारप्रसार गर्न निर्वाचन आयोगले निर्देशन दिएकाले पनि उम्मेदवारहरू आफ्ना कार्यकर्तासँग मात्र भेटघाट र अन्तरक्रिया गरिरहेका भेटिन्छन् । 

बारा जिल्लाको निर्वाचन क्षेत्र नम्बर ४ मा पर्छ, सिमरा । सिमरा बजार यस जिल्लाकै हब हो । यहाँका मतदाता तथा सर्वसाधारणले सबै दलप्रति निराशा व्यक्त गरेका छन् । 

रोजगारी, भौतिक पूर्वाधार निर्माण लगायतका कुराहरूमा जितेर गएका सांसदले ध्यान दिनुपर्ने उनीहरूको आग्रह छ । 

सिमरा स्टेसनरी चलाइरहेका युवा मतदाता निरज थापा रोजगारी सिर्जना नै यस क्षेत्रबाट जित्ने सांसदको मुख्य प्राथमिकतामा पर्नुपर्ने बताउँछन् ।

‘यहाँ बेरोजगारीको ठूलै समस्या छ,’ उनी भन्छन्, ‘धेरै युवा त विदेशै जान खोज्छन् अनि यहाँ भएकाहरू पनि इलममा लागेका छैनन् । पसल खोलेकाहरू पनि दिनभरि लुडो खेल्ने र ग्राहकलाई ध्यान नदिने गरिरहेका छन् ।’

माडवारी समुदायले पथलैयादेखि वीरगञ्जसम्मको क्षेत्रमा सानाठूला सबै किसिमको व्यापार व्यवसाय गरेर पैसा कमाइरहेको तर स्थानीय युवाहरूले त्यसरी उद्यम नगरेकोमा उनको चिन्ता छ । 

‘पथलैयादेखि वीरगञ्जसम्म पैसा उडिरहेको छ तर माडवारीहरूले मात्र त्यसलाई टिपिरहेका छन्,’ उनले भने ।

बारा र पर्सा जिल्लामा उद्योग कलकारखाना पनि प्रशस्तै छन् । तर ती कारखानामा स्थानीय युवाले काम गर्न नपाएको गोल्डस्टार शोरूमका सञ्चालक दीपक थपलिया बताउँछन् । 

‘यहाँका कालकारखानामा जागिर पाउनका लागि नेताहरूलाई पैसा खुवाउनुपर्छ,’ उनले आरोप लगाए । 

थपलियाको यो आरोपलाई सिमरा बजारमा चियापसल व्यवसाय गर्ने सन्तोषी सिंह केसीले पनि दोहोर्‍याइन् । 

‘पावर र सोर्स भएकाहरूले मात्र कारखानामा जागिर पाउँछन्,’ उनले भनिन्, ‘अझ त्यसमाथि कारखानामा नेपालीभन्दा पनि बढी भारतीयहरूले काम गरिरहेका छन् ।’

दलीय नेतृत्वबाट थपलिया र केसी दुवै असन्तुष्ट छन् । ‘अहिलेको चुनावमा कुनै पनि राम्रो उम्मेदवार उठेका छैनन्,’ थपलियाले भने, ‘अब बूढाखाडाले चुनाव जित्नहुँदैन बरू पढेलेखेका युवा आउनुपर्छ ।’

स्वतन्त्र उम्मेदवारहरूबाट केही आशा गर्न सकिन्छ त भन्ने लोकान्तरको प्रश्नमा थपलिया भन्छन्, ‘स्वतन्त्र मात्र भनेर पनि भएन, समाजमा केही योगदान गरेको मान्छे हुनुपर्‍यो । त्यस्तो मान्छे मात्र राजनीतिमा आउँदा सही हुन्छ ।’

केसीचाहिँ यसपालि चुनावमा भोट हाल्नै मन नलागेको बताउँछिन् । ‘स्थानीय निर्वाचनमा जितेकाहरूले त केही काम गरेका छन् तर जितेपछि काठमाडौं जाने नेताहरूलाई के भोट हालिरहनु,’ उनी भन्छिन् । 

उनकै जस्तो निराशा फेन्सी पसल चलाइरहेकी हसिना खातुनले पनि व्यक्त गरिन् । ‘चुनाव जितेर गएकाहरूले राम्रो काम गरेका छैनन्,’ उनले गुनासो गरिन् । 

खातुनजस्ता सानो व्यापार व्यवसाय चलाइरहेकाहरूलाई उठिबास हुने डरले पनि सताइरहेको छ । 

‘हामीले दोकान गरिरहेको ठाउँ भत्काएर ठूलो मल बनाउने सुनेका छौं,’ उनले भनिन्, ‘हामीलाई कहाँ पठाउने हो, भरोसा छैन ।’

बाटाघाटाहरू राम्रो नभएको गुनासो पनि स्थानीयहरूले गरेका छन् । ‘मुख्य बजारको भित्री बाटो राम्रो छैन,’ थापाले भने, ‘बर्खामा सडकमै पानी जम्ने समस्या छ अनि ट्राफिक जाम पनि ठूलै समस्या हो ।’

बारा क्षेत्र नम्बर ४ मा मुख्य प्रतिस्पर्धा सत्तारूढ गठबन्धनका तर्फबाट नेकपा एसका उम्मेदवार किसान श्रेष्ठ र विपक्षी एमाले गठबन्धनका तर्फबाट इकबाल मियाँबीच छ । यी दुई प्रतिद्वन्द्वीमा कडा टक्कर रहेको स्थानीयहरू बताउँछन् ।

एमालेमा आउनुअघि लोसपामा रहेका इकबाल मियाँले अघिल्लोपटकको निर्वाचन जितेका हुन् । तर चुनाव जितेपछि निर्वाचन क्षेत्रका जनतालाई उनले वास्तै नगरेको आरोप स्थानीयहरू लगाउँछन् ।  

तर एमालेका कार्यकर्ताहरू मियाँको तत्कालीन दल लोसपा सरकारमा खासै जान नपाएकाले उनलाई क्षेत्रमा गतिला योजना पार्न गाह्रो भएको तर्क गर्छन् । 

सांसदका रूपमा उनले सदनमा आवाज उठाउने र निर्वाचन क्षेत्र विकासका लागि पाइने बजेट सदुपयोग गर्ने गरेकाले उनीसँग स्थानीय मतदाता असन्तुष्ट नरहेको उनीहरूको जिकिर छ ।

उता किसान श्रेष्ठको कुरा गर्दा उनले श्रममन्त्री हुँदा बारा क्षेत्र ४ का धेरै युवालाई विदेश पठाउन सहयोग गरेको सिमरा स्टेसनरीका निरज थापाको भनाइ छ । 

थापा सिमरा युनाइटेड फूटबल क्लबका पनि सञ्चालक हुन् । क्लब तथा समग्र खेलकुद क्षेत्रको विकासका लागि श्रेष्ठले निकै रकम खर्च गरेको थापा दाबी गर्छन् ।

रकम खर्च गर्ने सवाल उठ्दा चुनावमा श्रेष्ठ र मियाँ दुवैले उत्तिकै पैसा लगाइरहेको एक स्थानीयले बताए । 

‘अहिले त चुनावी माहोल तातेकै छैन, अन्तिमतिर गएपछि पैसाको ठूलो चलखेल हुन्छ अनि त्यसैले परिणाम निर्धारित गर्छ,’ नाम खुलाउन नचाहेका ती स्थानीयको भनाइ छ ।