गोरखा निर्वाचन क्षेत्र नम्बर १ का उम्मेदवार एवं नेपाली कांग्रेसका नेता राजेन्द्र बजगाईंले नेपालमा राजनीति दलप्रति वितृष्णा उठिरहेको भन्दै नेताहरूले देशको समृद्धि र विकासमा जोड दिन आवश्यक रहेको बताएका छन् । बिहीवार काठमाडौंमा भएको गोरखा जिल्लाका गठबन्धनका साझा उम्मेदवारहरूको परिचयात्मक चुनावी प्रचारप्रसार कार्यक्रम समारोहलाई सम्बोधन गर्दै उनले दलका प्रतिनिधिहरूले काम गर्न सकेनन् भन्ने आवाज उठिरहेको बताए । उनले अबको गठबन्धन सरकारले नै त्यस्ता आवाजलाई चिर्ने काम गर्ने बताए । 

नेता बजगाईंले पार्टीका कार्यकर्तालाई एकले अर्को पार्टीको चुनाव चिन्हमा कसरी मतदान गर्ने भन्ने संशय पैदा भइरहेकाले ठूला नेताहरूले नै एक-अर्कालाई स्वीकारेपछि ढुक्क भएर मतदान गर्न आग्रह गरे । उनले यो गठबन्धन आगामी दिनमा पनि लामो समयसम्म टिक्ने दाबी गर्दै गठबन्धनका उम्मेदवारहरूलाई धेरैभन्दा धेरै मत दिएर जिताउन आग्रह गरे । उनले नेपालमा गठबन्धनका नेताहरूबाट नै विकासका कार्यक्रमहरूले गति लिने दाबी गरे । उनले गोरखाको विकासका लागि आफू सदैव प्रतिबद्ध रहेको बताए । 

‘नेपालमा राजनीति दलप्रति वितृष्णा र दलका प्रतिनिधिहरूले काम गर्न सकेनन् भन्ने जन–जनमा आवाज उठिरहेको छ, त्यसलाई हामीले नै चिर्न सक्छौँ । लार्केलाई विशेष रूपले हेर्नुपर्नेछ । यहाँ प्रतिष्ठाको कुरा आयो, कसरी हामी हँसिया हतौडामा मत हाल्ने, कसरी रुखमा मत हाल्ने ? हामीले यसअघि पनि एक-अर्कालाई मत हालिसकेकाले यसलाई अप्ठ्यारो नमानिकन भोट हाल्नुहोस् । भोलिको दिनमा हामी निर्वाचित भइसकेपछि यो गठबन्धन धेरै वर्ष टिक्नेछ । गोरखाको विकासका लागि म सदैव लागिपर्नेछु । नेपालमा अब गठबन्धनका नेताहरूबाट नै विकासका कार्यक्रमहरू तय हुनेछन् । संविधानको रक्षाका लागि हामी सदैव लागि पर्नेछौँ’, नेता बजगाईंले भने ।