आगामी पुस २९ गते रिलिज हुने तयारीमा रहेको साम्राज्ञी शाह तथा पुष्प खड्का स्टारर फिल्म ‘तिम्रो मेरो साथ’ले टिकटक भिडियो प्रतियोगिता आह्वान गरेको छ । 

निर्माता रमेश एमके पौडेलको निर्देशकीय डेब्यू फिल्मले तिहारमा रिलिज गरेको ‘रुमालै बाटेर टाई बनाम’ बोलको गीतमा टिकटक भिडियो प्रतियोगिता घोषणा गरेको हो । 

फिल्मको यो गीतले यूट्यूबमा रिलिज भएको १२ दिनमा १२ लाख भ्युज पाइसकेको छ । 

टिकटक प्रतियोगितामा भाग लिन चाहने इच्छुकले गीतको बोलमा तीन वटा ह्यासट्याग प्रयोग गरेर भिडियो बनाउनुपर्नेछ ।

उनीहरूले #rumalaibatera, #timromerosath, #RameshMKPoudel ह्यासट्याग प्रयोग गर्नुपर्नेछ ।

सहभागीहरूले यी ह्यासट्यागको प्रयोग गरेर भिडियोलाई आफ्नै अकाउन्टमा अपलोड गर्नुपर्नेछ । यसको अन्तिम नतिजा पुस २६ गते घोषणा गरिनेछ ।

यो प्रतियोगिता फिल्मका अन्य गीतमा पनि ती गीत रिलिज भएसँगै क्रमशः लागु हुनेछ । 

फिल्ममा कुल ३ वटा गीत रहेका छन् । ‘रूमालै बाटेर टाई बनाम’बोलको गीत सुभाष भुसालको संगीतमा तयार भएको हो भने शब्द वि पाण्डेले लेखेका हुन् । 

गीतमा मेलिना राई र जगदीश समालको युगल स्वर छ ।

फिल्ममा साम्राज्ञी तथा पुष्पको अलावा सन्दिप क्षेत्री, ईमिली लामा, सरोज खनाल, दिपिशा केसी, खड्ग बहादुर पुन (खबपु)  आदिको मूख्य भूमिका छ । फिल्मलाई सबिर श्रेष्ठ तथा बाबुराम निरौलाले संयुक्तरुपमा लेखेका हुन् । 

आर्यन फिल्मस् र बोधी एचडिको ब्यानरमा निर्माण भएको फिल्ममा पासाङ लामा निर्माता हुन भने निरू भण्डारी, अशोक पोखरेल, सुमन पौडेल तथा सुधिर पराजुली सह–निर्माताका रूपमा छन् । यसैगरी सबिर श्रेष्ठ फिल्मका कार्यकारी निर्माता हुन् ।