ठूला राजनीतिक दलबाट प्रदेश–१ सभा सदस्यमा उम्मेदवार भएका हेवी–वेट उम्मेदवारले आफूलाई मुख्यमन्त्रीको दाबेदार भन्दै भोट मागिरहेका छन् । 

मुख्य ४ दलका करिब एक दर्जन नेता मुख्यमन्त्रीको दावी गर्दै चुनावी मैदानमा छन् । प्रदेश सभाको पहिलो कार्यकालमा प्रदेशको नामाकरण नै गर्न नसकेका मुख्यमन्त्रीदेखि मन्त्रीसम्म दोस्रो कार्यकालमा पनि मुख्यमन्त्रीका आकाङ्क्षी छन् । 

यसअघि मुख्यमन्त्री बनेका नेकपा एमालेका नेता शेरधन राई र भीम आचार्य प्रतिनिधिसभा सदस्यको उम्मेदवार बनेका छन् भने बहालवाला मुख्यमन्त्री राजेन्द्रकुमार राई प्रदेशसभा सदस्यमै उम्मेदवार बनेका छन् । उनी भोजपुरको प्रदेश सभा निर्वाचन क्षेत्र (१) बाट उम्मेदवार बनेका छन् ।

हुन त मुख्यमन्त्री राईले पनि प्रतिनिधि सभा सदस्यकै उम्मेदवार बन्ने चाहना राखेका थिए । तर, सत्तारूढ गठबन्धमा भोजपुर माओवादीको भागमा पर्दा नेता सुधन किँरातीले टिकट पाएपछि उनी राई प्रदेश सभा सदस्यकै उम्मेदवारकोरूपमा दोहोरिन बाध्य भए । राईलाई नेकपा एकीकृत समाजवादीका अध्यक्ष माधव नेपालले फेरि पनि मुख्यमन्त्री बनाउने आश्वासनसहित प्रदेशमा उम्मेदवार बनाएका हुन् ।  

प्रदेश–१ सरकार बनेपछि बीचमा केही समय बाहेक निरन्तर आर्थिक मामिलामन्त्री बनेका नेकपा माओवादी केन्द्रका नेता इन्द्रबहादुर आङ्बोले पनि आफूलाई मुख्यमन्त्रीको दाबेदारकोरूपमा मतदातामाझ प्रस्तुत गरिरहेका छन् । 

प्रदेश सरकारमा सबैभन्दा लामो समय मन्त्री भएका उनी कुनै विवादमा नपरेका नेता हुन् । माओवादीबाट उनी मुख्यमन्त्रीका एक्ला दाबेदार हुन् । उनी पाँचथरको निर्वाचन क्षेत्र नम्बर १ (२) बाट दोस्रो कार्यकालको लागि प्रदेशसभा सदस्यको उम्मेदवार भएका छन् ।

कुटनीतिक र चलाख राजनीतिज्ञको पहिचान बनाएका उनी आगामी निर्वाचनपछि बन्ने गठबन्धन सरकारमा मुख्यमन्त्रीको प्रमुख दाबेदारकोरूपमा रहेको प्रदेश–१ का नेताहरू बताउँछन् । उनलाई पनि प्रचण्डले मुख्यमन्त्री बनाउने आश्वासन दिएको उनी निकट नेताहरू दावी गर्छन् ।

नेपाली काँग्रेसबाट प्रदेशको मुख्यमन्त्रीको दावीसहित चुनावी मैदानमा आएका नेताहरू धेरै छन् । मोरङ क्षेत्र नम्बर–५ (२) बाट उम्मेदवार बनेका कांग्रेस केन्द्रीय सदस्य अमृत अर्याल र ४ (१) बाट प्रदेशसभा सदस्यको उम्मेदवार बनेका गुरूराज घिमिरेले आफूलाई मुख्यमन्त्रीको दाबेदारकोरूपमा मतदातामाझ चिनाइरहेका छन् । 

यसअघि संविधानसभा सदस्य भइसकेका अर्याल यस पटक प्रतिनिधिसभा सदस्यको उम्मेदवार बन्न चाहेका थिए । तर, मोरङको क्षेत्र नम्बर–५ माओवादी केन्द्रको भागमा परेपछि उनी मुख्यमन्त्रीको दावीसहित प्रदेशसभाको उम्मेदवार बन्न राजी भएका हुन् । उनलाई काग्रेस सभापति शेरबहादुर देउवाले मुख्यमन्त्री बनाउने आश्वासन दिएको कांग्रेस बृत्तमा चर्चा छ । 

कांग्रेसमा प्रभावशाली मानिएका नेता गुरूराज घिमिरे पनि कांग्रेसबाट मुख्यमन्त्रीका प्रमुख दाबेदार मानिएका छन् । 

पहिलो प्रदेशसभामा काँग्रेस संसदीय दलका नेता रहिसकेका पार्टीका केन्द्रीय सदस्य राजिव कोइराला पनि मुख्यमन्त्री आकांक्षासहित सुनसरी क्षेत्र नम्बर–२ (२) बाट उम्मेदवार बनेका छन् । कांग्रेसमा डा.शेखर कोइराला निकट मानिने उनी पनि प्रतिनिधिसभा सदस्यकै उम्मेदवार बन्ने तयारीमा थिए । सुनसरी क्षेत्र नम्बर–२ मा कांग्रेसले निवर्तमान सांसद सिताराम मेहतालाई उम्मेदवार बनाएपछि कोइरालाले प्रदेश सभा उम्मेदवारमा चित्त बुझाउनु परेको हो ।

काँग्रेसको प्रदेश–१ सभापति उद्धव थापा पनि मुख्यमन्त्रीको दावीसहित प्रदेश सभा सदस्यको समानुपातिक उम्मेदवार छन् । समानुपातिक सूचीमा खस आर्य कोटामा उनको नाम पहिलो नम्बरमा राखिएको छ । उनी कांग्रेसमा नेता कृष्णप्रसाद सिटौला निकट मानिन्छन् ।

नेकपा एमालेबाट अहिलेसम्म प्रदेश–१ मा दुई जना मुख्यमन्त्रीको दाबेदार देखिएका छन् । झापा क्षेत्र नम्बर–५ (२) बाट उम्मेदवार बनेका एमलोका स्थायी समिति सदस्य हिक्मतकुमार कार्कीले मुख्यमन्त्रीको दावीसहित चुनावी प्रचार गरिहेका छन् । शेरधन राई नेतृत्वको सरकारमा कार्की आन्तरिक मामिला तथा कानूनमन्त्री थिए । 

मोरङ क्षेत्र नम्बर–४ (२)बाट उम्मेदवार बनेका एमाले नेता जीवन घिमिरेले पनि आफूलाई मुख्यमन्त्रीको दाबेदारकोरूपमा चिनाइरहेका छन् । जनता समाजवादी पार्टी (जसपा)सँगको तालमेलको क्रममा मोरङ–४ (२) एमालेले शुरूमा छाडेको भए पनि मनोनयनको अन्तिम समयमा एमालेले उनलाई टिकट दिएको थियो । 

शेरधन राई नेतृत्वको सरकारमा घिमिरे सामाजिक विकासमन्त्री थिए । तत्कालिन प्रधानमन्त्री केपी शर्मा ओलीले संसद विघटन गरेपछि प्रतिगमन भएको भन्दै पदबाट राजीनामा दिएका उनी एमालेमा १० बुँदे सहमति पक्षधर नेता हुन् ।