शिक्षा, विज्ञान तथा प्रविधिमन्त्री देवेन्द्र पौडेलले आफूले यसपटकको निर्वाचनमा १५ हजार मतान्तरले जित्ने दाबी गरेका छन् ।

मंगलवार बागलुङको ताराखोलामा आयोजित चुनावी अभियानलाई सम्बोधन गर्दै मन्त्री पौडेलले अहिलेको लडाइँ प्रतिगमनकारीविरुद्ध भएकाले सबै एकजुट हुनुपर्ने बताए ।

प्रतिगमनकारीहरूले लोकतन्त्रलाई समाप्त पार्न खोजेको आरोप लगाउँदै उनले उनीहरू संविधान विरोधी भएको समेत बताए ।

बागलुङको २ नम्बर निर्वाचन क्षेत्रबाट ५ दलीय गठबन्धनका साझा उम्मेदवार समेत रहेका मन्त्री पौडेलले भने, ‘५ दल एकै ठाउँमा नआएको भए प्रतिगामीहरूले मुलुकलाई अँध्यारो सुरुङभित्र हालिसक्थे ।’

५ दलीय गठबन्धन चुनावका लागि मात्र नभई लोकतन्त्र र संविधान रक्षाका लागि बनेको उनले बताए । अघिल्लो कार्यकालमा शुरू गरेका योजना पूरा गर्न र यस क्षेत्रको मुहार फेर्नका लागि आफू फेरि एकपटक चुनावमा होमिनुपरेको मन्त्री पौडेलले जिकिर गरेका छन् ।