नेपाली कांग्रेसका नेता प्रकाशमान सिंहले चुनाव जित्नेमा आफू ढुक्क रहेको दावी गरेका छन् । 

गणेशमान सिंहको १०८ औं जन्मजयन्तीको अवसरमा आयोजित कार्यक्रमलाई सम्बोधन गर्दै उनले लोकतान्त्रिक–वाम गठबन्धनले मात्रै देशलाई प्रगतिको पथमा लैजाने दावी गरेका छन् ।

गणेशमान सिंहले वामपन्थीहरूलाई साथमा लिएर २०४६ सालको जनआन्दोलन सफल बनाएको भन्दै प्रकाशमानले अहिले पनि त्यो कार्यगत एकता उत्तिकै सान्दर्भिक रहेको बताए ।

काठमाडौं क्षेत्र नम्बर–१ बाट उम्मेदवार रहेका सिंहले मतदाताले आफूलाई रूचाएको दावी गरेका छन् । आफूले क्षेत्र नम्बर–१ को विकासमा योगदान गरेको र जनताले त्यसको मूल्यांकन गरिरहेको उनको भनाई थियो । 

व्यक्तिले कब्जा गरेका सरकारी जग्गा फर्काएर १५ स्थानमा पार्क, सामुदायिक भवन र व्यायामशाला बनाइसकेको, ज्येष्ठ नागरिकको सुविधाका लागि एउटा सुविधासम्पन्न भवन बनिरहेको बताए ।

निर्वाचन प्रचारको क्रममा मतदाताको घरदैलोमा पुग्दा धेरै समस्या सुनाएको र त्यसलाई समाधान गर्न आफू लागिपर्ने उनले बताए ।