शिक्षा, विज्ञान तथा प्रविधिमन्त्री देवेन्द्र पौडेलले मंसिर ४ गते हुने प्रतिनिधिसभा र प्रदेशसभा निर्वाचनमा बागलुङ जिल्लाका ६ वटै सिटमा सत्ता गठबन्धनका उम्मेदवार विजयी हुने दाबी गरेका छन् ।

तमानखोला गाउँपालिकाको बोङ्गादोभानमा बिहीवार आयोजित चुनावी सभामा बोल्दै उनले ५ दलीय गठबन्धनका उम्मेदवार भारी मतान्तरसहित विजयी हुने जिकिर गरे । 

‘गठबन्धनका मतले मात्रै जीत हासिल गर्न सकिन्छ तर त्यतिले मात्रै पुग्दैन, अत्यधिक मतसहित गठबन्धनका उम्मेदवार विजयी हुनुपर्छ,’ मन्त्री पौडेलले भने । उनले संविधानको रक्षासँगै विकास र पूर्वाधारका कामलाई अगाडि बढाउन गठबन्धनका उम्मेदवारलाई विजयी बनाउनु आग्रह गरे ।

उनले मुलुकको आवश्यकताका आधारमा ५ दलीय गठबन्धन बनेको बताए । चुनाव जितेपछि बन्ने गठबन्धनको सरकारले नै मुलुकलाई विकास, समृद्धि र स्थिरतातिर लैजाने उनको दाबी छ । 

नेकपा माओवादी केन्द्रका सचिव पौडेल बागलुङ–२ बाट प्रतिनिधिसभा सदस्यको उम्मेदवार छन् । उनी २०७४ सालको चुनावमा पनि सोही क्षेत्रबाट विजयी भएका थिए ।