मंसिर ४ गते हुने प्रतिनिधि सभा निर्वाचनका लागि मोरङ–६ बाट सत्ता गठबन्धनका साझा उम्मेदवार नेपाली कांग्रेसका डा. शेखर कोइरालाले आफ्नो पक्षमा माहोल सिर्जना गरेका छन् । २०७४ सालको चुनावमा माओवादीको समेत समर्थन रहेका वामपन्थी गठबन्धनका उम्मेदवारसँग झिनो मतान्तरले पराजित भएका कोइराला यसपटक कमब्याकको तयारीमा लागेका छन् ।

राष्ट्रिय राजनीतिमा खेल्न सक्ने भूमिकाका कारण विराटनगरका स्थानीय मतदाता र उद्योगी/व्यावसायी शेखर कोइरालाको पक्षमा देखिएका छन् । विराटनगर महानगरपालिकामा कांग्रेसको जितसँगै कोइरालाले आफ्नो चुनावी धरातल बलियो बनाएका थिए ।

‘विचारमा प्रखर,संसदमा शेखर’ नारासहित कोइराला मोरङ–६ बाट चुनावी मैदानमा उत्रिएका हुन् । सत्ता गठबन्धनका साझा उम्मेदवार कोइरालासँग नेकपा एमालेका नेता लालबाबु पण्डितले प्रतिस्पर्धा गर्दैछन् । कांग्रेसको बलियो जनमत,नेकपा माओवादी,नेकपा एकीकृत समाजवादी र लोकतान्त्रिक समाजवादी पार्टीको समर्थनका कारण कोइराला सुरक्षित देखिएका छन् ।

पार्टीभित्रको बढ्दो प्रभाव,राष्ट्रिय राजनीतिमा खेल्नसक्ने हस्तक्षेपकारी भूमिका तथा समन्वयकारी भूमिकाका कारण मोरङका मतदाताले यसपटक कोइरालालाई छान्ने विश्वास लिइएको छ । पाँच कारण जसले शेखरलाई संसदमा छुट्न नहुने नेताको रुपमा लिन सकिन्छ ।

पार्टी भित्रको वैकल्पिक नेता

कांग्रेसभित्र संस्थापन इतर समूहको नेतृत्व गरेका शेखर पार्टीको वैकल्पिक नेताको रुपमा स्थापित हुँदैछन् । गतवर्षको मंसिरमा सम्पन्न १४ औं महाधिवेशनमा सभापतिका लागि प्रतिस्पर्धा गरेका कोइरालाले उल्लेख्य मत पाएका थिए । सभापतिमा पराजित भएपनि उनले राष्ट्रिय मुद्दामा कांग्रेसलाई दवाव सिर्जना गरेका थिए । सत्ता गठबन्धनले संविधानको आफूखुसी व्याख्या गरेर स्थानीय तहको निर्वाचन सार्ने तिकडम गरेको समयमा कोइरालाले पार्टीभित्र दवाव सिर्जना गरेका थिए । फलस्वरुप सभापति एवं प्रधानमन्त्री शेरबहादुर देउवाले वैशाख महिनामा स्थानीय तहको चुनावको घोषणा गरेर चुनाव गराए । त्यो बेला कांग्रेसका ‘देउवाको नेतृत्व,शेखरको नीति’को चर्चा भएको थियो ।

टेस्ट नभएका नेता

पार्टी राजनीतिमा देउवासँग सभापतिमा प्रतिस्पर्धा गरेपनि राजकीय भूमिकामा शेखर कोइराला अहिलेसम्म परीक्षण नभएका नेता हुन् । भोलिको दिनमा कांग्रेसले प्रधानमन्त्रीको उम्मेदवार बनाउन सक्ने एक अनुहार शेखर पनि हुन् । व्यवस्थापकीय क्षमताको दृष्टिले कोइराला अपवाद नेता हुन्,जसले बीपी कोइराला स्वास्थ्य विज्ञान प्रतिष्ठानको उपकुलपतिको रुपमा खेलेको भूमिका उदाहरणीय छ । चिकित्सा शिक्षा अध्ययनको रुपमा बीपी कोइराला स्वास्थ्य विज्ञान प्रतिष्ठान नेपालको अग्रणी संस्था हो । जसको संस्थागत सुधारको काम शेखरले गरेर प्रमाणित गरेका थिए ।

कोइराला परिवारको विरासत

नेपाली कांग्रेसभित्र कोइराला परिवारको विरासत धान्ने नेताको रुपमा शेखर अगाडि सरेका छन् । कांग्रेस राजनीतिमा सक्रिय कोइराला परिवारका तीन सदस्य मध्ये शेखरले त्यो विरासत धान्ने प्रयास गरेका छन् । सुजाता र डा. शशांक कोइराला कांग्रेसको नेतृत्वको दौडमा पछि परेका छन् । सुजाता प्रकाशमान सिंह प्यानलबाट उपसभापति लडेर पराजित भएकी थिइन् भने शशांकले १४ औं महाधिवेशनमा पदाधिकारीमा प्रतिस्पर्धा गरेनन् ।

महामन्त्री बनिसकेका शशांक केन्द्रीय सदस्यमा फर्केर शेखरलाई बाटो फराकिलो बनाइदिएका छन् । बिहीबार शेखरले सुनसरी ४ मा पुगेर शेरबहादुर देउवाको विश्वासपात्र रहेका ज्ञानेन्द्र बहादुर कार्कीको पक्षमा भोट मागे । गिरिजाप्रसाद कोइरालाको प्रभावको छाप रहेको क्षेत्रमा कोइराला गएर भोट माग्दा कार्कीलाई फाइदा पुगेको विश्वास गरिएको छ ।

राष्ट्रिय मुद्दामा सशक्त अडान

राष्ट्रिय मुद्दामा सशक्त अडान लिने नेताको रुपमा शेखर परिचित छन् । पार्टीका नेता र अन्य दलका नेताहरूले मुख खोल्न नसकेका विषयमा पनि कोइरालाले आफ्नो अभिमत दिइरहेका हुन्छन् ।

शान्ति प्रक्रियाको पर्दा पछाडिका नायक

माओवादी सशस्त्र संघर्षलाई शान्तिपूर्ण अवतरण गराउने भूमिकामा शेखर गिरिजाप्रसाद कोइरालाको मुख्य सहयोगीको रुपमा काम गरेका थिए । माओवादी केन्द्रका अध्यक्ष पुष्पकमल दाहाल प्रचण्डले हालै शेखरलाई ‘शान्ति प्रक्रियाको पर्दा पछाडिको नायक’को संज्ञा दिएका थिए । सत्य निरुपण र बेपत्ता पारिएका व्यक्तिको खोजविन जस्ता शान्तिप्रक्रियाका अधुरा काम पूरा गर्नपनि शेखर संसदमा पुग्नु जरुरी छ । संविधानसभाबाट संविधान जारी गर्ने काममा पनि तत्कालीन प्रधानमन्त्री सुशील कोइरालाको सहयोगीको भूमिकामा शेखरले काम गरेका थिए ।