जनकपुरधाम उपमहानगरपालिकाको मेयर मनोज कुमार साह सुडीको गाउँ रहेको जनकपुरधाम उपमहानगरपालिका–१५ मा नेकपा एमालेकी जुली महतोले अग्रता लिएकी छन् ।

मेयर सुडी नेपाली कांग्रेसका बागी उम्मेदवार बनेर मेयरमा निर्वाचित भएका थिए ।

उनको गाउँमा सत्ता गठबन्धनबाट लोकतान्त्रिक समाजवादी पार्टीका उम्मेदवार अनिलकुमार झाले ३१० मत मात्र पाएका छन् भने एमालेकी उम्मेदवार महतोले झण्डै दोब्बर ६०८ मत पाएर अग्रता कायम गर्न सफल भएकी छन् ।

जनमत पार्टीका उम्मेदवार शम्भू साहले लोसपाका उम्मेदवार झाभन्दा १० मत बढी ल्याएका छन् । साहले ३२० मत ल्याएका छन् ।

जनकपुरका मेयर साहलाई जिताउन नेपाली कांग्रेसका नेता बिमलेन्द्र निधिले महत्त्वपूर्ण भूमिका खेलेका थिए तर मेयर साहले अहिले स्वतन्त्र रहेर भूमिका नखेलेको स्थानीयहरू बताउँछन् ।

उक्त वडामा लोसपाका सन्तोष कुमार साह वडाध्यक्षमा निर्वाचित भएका थिए । लोसपाले जितेको वडामा समेत एमालेको अग्रता देखिएको छ । एमाले उम्मेदवार महतो र मेयर दुवै सुडी जातिका हुन् भने लोसपा उम्मेदवार झा ब्राह्मण हुन् ।

दलगतभन्दा पनि जातीय आधारमा त्यहाँ मतदान भएको स्थानीयहरू बताउँछन् ।