शहरी विकासमन्त्री मेटमणि चौधरीले दोस्रोपटक सांसद निर्वाचित भई संसदीय यात्राको पहिलो खुड्किलो पार गरेका छन् ।

विक्रम संवत् २०७४ सालको निर्वाचनमा दाङको १ नम्बर निर्वाचन क्षेत्रबाट नेकपा एमालेका तर्फबाट सांसद निर्वाचित भएका चौधरी २०७८ सालमा नेकपा एकीकृत समाजवादीमा प्रवेश गरेका थिए ।

समाजवादीमा प्रवेश गरेपछि भने उनी पहिलोपटक सत्ता गठबन्धनका तर्फबाट उम्मेदवार बनी विजयी भएका छन् ।

विक्रम संवत् २०२९ चैत १० गते दाङको गठवामा भगवतीप्रसाद र थिवरात्री चौधरीको सुपुत्रका रूपमा जन्मिएका उनले राजनीतिशास्त्र र अर्थशास्त्रमा स्नातकोत्तरसम्मको अध्ययन गरेका छन् । राजनीतिसँगै हाल उनी विद्यावारिधि अध्ययनरत समेत छन् । 

विक्रम संवत् २०४५ सालमा नेकपा मालेको सदस्यता लिएर उनले राजनीति शुरू गरेका थिए । विक्रम संवत् २०४६ सालमा उनले अनेरास्ववियु छैटौंको सदस्यता लिए । चौधरी २०४७ सालमा एमाले प्रवेश गरे ।

विक्रम संवत् २०४८ सालमा चौधरीले अनेरास्ववियुको क्याम्पस प्रारम्भिक कमिटीमा बसेर काम गरे । उनी २०७५ सालमा एमाले र माओवादी एकता केन्द्र भएपछि बनेको नेपाल कम्युनिस्ट पार्टी (नेकपा) को केन्द्रीय सदस्य बने । चौधरीले नेकपाको दाङ जिल्लाको सहइन्चार्ज भएर पनि काम गरे ।

विक्रम संवत् २०७४ सालमा सांसदमा निर्वाचित भएपछि उनले संसद्का अर्थ समितिमा बसेर पनि काम गरे । विकास र अर्थतन्त्रमा विशेष रुचि राख्ने मन्त्री चौधरी २०५९ सालमा भएको प्रतिगमन विरुद्धको आन्दोलनका क्रममा ३ महिना जेल बसेका थिए ।

सांसद चौधरी आफूलाई समानताको पक्षधर तथा सामाजिक सद्भाव र एकताको पक्षधरका रूपमा परिचित गराउन चाहन्छन् । 

पिछडिएको क्षेत्र, जात र समुदायको पक्षमा उनले निरन्तर वकालत गर्दै आएका छन् । अधिकार र पहिचानका लागि हुने आन्दोलनमा मन्त्री चौधरीको नेतृत्वदायी भूमिका रहँदै आएको छ । ३ दशक लामो राजनीतिक यात्राका क्रममा उनले दोस्रोपटक सांसद हुने अवसर पाएका छन् ।

एमालेकी शान्ता चौधरीलाई ५ हजार मतान्तरले पछि पार्दै उनी विजयी भएका हुन् । मन्त्री चौधरीले २६ हजार ५६३ मत प्राप्त गरे । उनका प्रतिस्पर्धी शान्ताले २१ हजार ४७९ मत पाएका छन् ।