डेढ वर्षअघि उर्गेन दोङ र अस्मिता अधिकारीको स्वरमा सार्वजनिक ‘टाढा भए पनि’ बोलको गीत स्रोता दर्शकसामु निकै हिट बन्यो । पल शाह र मलिका महतको अभिनय रहेको उक्त गीतको भिडियोले युट्युबमा ६ हरोड २२ लाख बढी भ्युज पाइसकेको छ । 

त्यसपछि उर्गेनकै शब्द, संगीत र स्वरमा ‘टाढा भएपनि –२’ सार्वजनिक भयो । उक्त गीत पनि हिट भयो । यतिबेला भने उर्गेनकै शब्द, संगीतमा ‘टाढा भएपनि –२’को फिमेल भर्सन सार्वजनिक भएको छ । यस गीतमा अस्मिता अधिकारी र उर्गेन स्वयंले स्वर दिएका छन् । 

विकास प्रसाइको निर्देशनमा तयार भिडियोमा फिल्म क्षेत्रको चर्चित जोडी प्रियंका कार्की र आयुष्मान देशराज जोशीले अभिनय गरेका छन् । 

जितु तामाङको छायाँकन रहेको भिडियो उनकै सम्पादनपछि सार्वजनिक भएको हो । लक्ष्मीप्रसाद देवकोटाको खण्डकाव्य ‘मुनामदन’मा आधारित रहेर यस गीतको भिडियोको कथा बुनिएको छ । भिडियोले युट्युबमा झण्डै ४ लाख बढी भ्युज पाइसकेको छ । अधिकांश प्रतिक्रियाहरू सकारात्मक छन् ।