झापा क्षेत्र नम्बर १ बाट प्रतिनिधि सभा सदस्य निर्वाचित कांग्रेस महामन्त्री विश्वप्रकाश शर्माले मतदाता सम्मान अभियान थालेका छन् । निर्वाचन सकिएपछि काठमाडौं आएका उनले तुरुन्तै झापा फर्केर मतदाता सम्मान अभियान शुरु गरेका हुन् । 

महामन्त्री शर्माले मतदाताको घरघरमा पुगेर निर्वाचित गराएकोमा धन्यवाद व्यक्त गरिरहेको जानकारी दिएका छन् । सामाजिक सञ्जालमार्फत उनले आफू एक साँझमात्र काठमाडौं बसेर झापा फर्किएको र मतदाता सम्मान अभियानमा सरिक भइरहेको जानकारी दिएका छन् । उनले सन्देशमा लेखेका छन्, ‘केवल एक साँझ काठमाडौं बसेर बिहानै झापा पुगेको छु झापा १ मा मतदाता सम्मान अभियान केही बाँकी वडामा केहिदिन केन्द्रित रहेर, काठमाडौ पुग्नेछु ।’ 

उनले निर्वाचित भएलगत्तै मतदाता सम्मान अभियान शुरु गरेका थिए । शर्माले सरकार गठनका सन्दर्भमा पनि धारणा सार्वजनिक गरेका छन् । उनले सन्देशमा भनेका छन्, ‘परिवर्तनको अभियान प्रारम्भ भइसकेको छ । यसलाई निर्णायक बनाउन सबैको सालिन सक्रियता, परिपक्व संवाद र विवेकपूर्ण भूमिका अपेक्षित छ ।’

सत्तारुढ गठबन्धनका साझा उम्मेदवार शर्माले नेकपा एमालेका नेता अग्नि खरेललाई पराजित गर्दै प्रतिनिधि सभा सदस्यमा विजयी बनेका थिए । शर्माले ३९ हजार ६२४ मत प्राप्त गर्दा खरेलले २५ हजार ३४९ मत मात्र प्राप्त गरेका थिए ।  

शर्मा पहिलोपटक संसद सदस्यका रुपमा निर्वाचित भएका हुन् । यसअघि २०७४ मा उनी वाम गठबन्धनका उम्मेदवार राम कार्कीसँग पराजित भएका थिए ।