नेपाली कांग्रेस नेता तथा प्रतिनिधिसभा सदस्य डा. शेखर कोइरालाले कांग्रेसकै नेतृत्वमा सरकार बन्ने बताएका छन् ।

ठूलो पार्टी भएकाले अहिलेकै सत्ता गठबन्धनको नेतृत्व गर्दै कांग्रेसकै नेतृत्वमा सरकार बन्ने उनले बताए ।

उनले एकीकृत समाजवादी राष्ट्रिय दल बन्ने र संसदको संख्या थपिने विश्वास लिएका छन् । 

उनले संसदीय दलको नेताको विषयमा भने खुलेर बोल्न चाहेनन् । विराटनगरस्थित कोइराला निवासमा पत्रकारसँगको भेटघाटमा संसदीय दलको नेताको अंकगणितको खेल भएकाले अहिले नै म बन्छु भनेर बोल्ने बेला नआएको समेत उनले बताए ।

जनताको चाहना अहिले फरक रहे पनि संसदीय दलको नेता बन्न अंकगणितकै खेल भएकाले सरसल्लाह गरेर अगाडि बढ्ने उनले बताए । 

‘संसदीय दलको नेता नभए पनि संसदमा बोल्नेमा कसैले रोक्दैन । गलत भयो भने त्यसको विरोध संसदमा पनि गर्छाैं, सडकमा पनि गर्छाैं । गलत कामको विरुद्धमा संसदमा बोल्नलाई ह्वीपले छेक्दैन,’ उनले भने । 

उनले शेरबहादुर देउवा र शेखर कोइराला मिले भन्ने भनेर गलत प्रचार गरेको समेत बताए । ‘चुनावमा टिकट दिने विषयलाई लिएर मैले हामी मिलेर नै टिकट वितरण गरेका हौं, तपाईंहरू तल किन झगडा गर्नुहुन्छ भनेर भनेको थिएँ,’ उनले भने, ‘पार्टीभित्रका विंसगतिका विषयमा पार्टीभित्र म आवाज उठाइरहन्छु ।’ 

पार्टीभित्र सुनुवाइ भएन भने दलका भातृ संगठनलाई समेत उचाल्ने उनले बताए । 

चुनावको परिणामलाई लिएर समीक्षा गर्ने समेत उनले बताए । ‘गठबन्धनभित्र पनि विभिन्न खालका आवाजहरू आइरहेका छन्,’ उनले भने, ‘इलाममा झलनाथजीले कांग्रेसले असहयोग गर्‍यो भन्नुभएको छ । अन्यत्र पनि त्यस्ता समस्या छन् ।’

नेता गुरुराज घिमिरे हार्नुको कारण कांग्रेस भित्रकै अन्तर्घात भएको समेत उनले बताए ।