राष्ट्रिय स्वतन्त्र पार्टीका सभापति रवि लामिछानले आफूहरू संसद् र सडक दुवैतिर हुने बताएका छन् । प्रतिनिधि सभा सदस्य पदको निर्वाचन जितेपछि धरानका मेयर हर्क साम्पाङको शैलीमा चितवनमा खानेपानी व्यवस्थापनमा खटिएका उनले सामाजिक सञ्जालमा सन्देश लेख्दै आफूहरू भुँइ मान्छेका प्रतिनिधि भएको बताएका हुन् । 

उनी चाउचाउ खाँदै खानेपानी व्यवस्थापनका लागि जंगलतिर गएको भिडियो सार्वजनिक भएपछि उनको आलोचना भएको थियो । सांसदको मुख्य काम नीति निर्माण गर्नु भएको भन्दै धेरैले उनको कामको आलोचना गरेपछि जवाफमा उनले आफूहरूको उपस्थिति दुवैतिर अर्थात् सदन र सडकमा हुने बताएका हुन् । उनले नीतिहरू कागजमा मृत हुन नहुने भन्दै नागरिकले महसुस गर्ने गरी लागू हुनुपर्ने बताए । 

उनले लेखेका छन्, ‘हो, विधायकको काम नीति निर्माणमा नै ध्यान दिने हो । तर, काम गर्न गराउन फिल्डमा खट्नु पनि पर्छ । हामी भुँइ मान्छेका मान्छेहरू हौँ, भुँइ छोड्ने त कुरै आउँदैन नी ।
नीतिहरू कागजमा मृत भएर बस्नु हुन्न, नागरिकले महसुस गर्ने गरी लागू पनि हुनुपर्छ । त्यसैले हामी संसद् सडक दुवैतिर हुन्छौँ । हामी यस्तै छौँ ।’