प्रदेश १ मा प्रत्यक्षतर्फ चुनाव जित्ने सबैभन्दा कान्छा सांसद बनेका छन्, जीवन आचार्य । आचार्य नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’का ज्वाइँ हुन् ।

निर्वाचन आयोगमा पेस गरेको कागजात अनुसार जीवन ३६ वर्षका मात्रै भए । उनले एमालेकी रिता न्यौपानेलाई पराजित गरेका हुन् । रिता ४४ वर्षकी भइन् । 

जीवनपछि कम उमेरका सांसद एमालेका छविलाल चुडाल हुन् । ३९ वर्षीय चुडालले झापा ३(२) मा माओवादी केन्द्रका पूर्णप्रसाद राजवंशीलाई हराएका छन् । यस्तै पाँचथरबाट दोहोरिन लागेका माओवादी केन्द्रका इन्द्रबहादुर आङ्वो पनि कम उमेरका सांसदको सूचीमा पर्छन् ।

प्रदेश १ का आन्तरिक मामिला तथा कानून मन्त्री समेत रहेका आङ्वोले एमालेका अइन्द्रसुन्दर नेम्वाङलाई पराजित गरेका थिए । आङ्वो ४० वर्षका हुन् भने नेम्वाङ ४४ वर्षका भए । 

ताप्लेजुङबाट पनि युवा सांसद प्रदेशसभामा आउँदै छन् । कांग्रेसका खगेनसिंह हाङ्गाम ४० वर्षका भए । उनले एमालेका गोपाल थोप्रालाई पराजित गरेका हुन् । थोप्रा ६२ वर्षका हुन् ।  

तेह्रथुमको निर्वाचन क्षेत्र १(२)मा पनि युवा उम्मेदवार निर्वाचित भएका छन् । 

माओवादीबाट उम्मेदवार बनेका ४० वर्षीय दुर्गाप्रसाद चापागाईं निर्वाचित हुँदा ६८ वर्षीय एमाले उम्मेदवार तेजमान कन्दङ्वा पराजित भए । प्रदेशसभामा दोहोरिने तेजमानको धोको पूरा भएन ।

प्रदेशसभामा निर्वाचित भएकामध्ये सबैभन्दा ज्येष्ठ सदस्य कांग्रेसका गयानन्द मण्डल गनगाईं रहेका छन् ।  मण्डल ७९ वर्षका हुन् । उनले एमालेका सन्तोष शाह पराजित गरे । उनीहरूको उमेरमा २५ वर्षको अन्तर छ । देशमा युवाहरूको कुरा उठे पनि मोरङ ५(१)का मतदाताले भने युवालाई छाडेर वृद्धलाई चुनाव जिताए ।

सुनसरी ३(१) बाट निर्वाचित एमालेका रोहितबहादुर कार्की ७१ वर्षका भए । उनले ४७ वर्षकी सरस्वती पोख्रेलेलाई हराएका थिए । 

सुनसरी २(२) मा एमालेबाट निर्वाचित भएका रामप्रसाद महतो ६७ वर्षका हुन् । उनले कांग्रेसका राजीव कोइराला (६० वर्षीय)लाई पराजित गरे ।

कोइराला यसअघि नेपाली कांग्रेस प्रदेश १ को संसदीय दलको नेता समेत थिए । 

मोरङ १(१) बाट निर्वाचित भएका एमालेका खड्गबहादुर बस्नेत पनि ६७ वर्षका हुन् । उनले एकीकृत समाजवादीका उपेन्द्रप्रसाद घिमिरेलाई पराजित गरेका थिए । घिमिरे ५९ वर्षका हुन् । घिमिरे प्रदेश १ का बहालवाला यातायात तथा सञ्चार मन्त्री समेत हुन । 

यस्तै संघीय निर्वाचन क्षेत्र १ र प्रदेशतर्फ २ वटा क्षेत्र रहेको तेह्रथुममा पनि युवा उम्मेदवार पराजित हुँदा वृद्धले चुनाव जितेका छन् । कांग्रेसबाट उम्मेदवार बनेका ४४ वर्षीय सन्तोष सुब्बाले चुनाव हार्दा एमाले उम्मेदवार ६५ वर्षीय किशोरचन्द्र दुलाल विजयी भए ।

प्रदेश १ मा ३६ वर्षदेखि ४० वर्षसम्मका ६ जना मात्रै सांसद प्रदेशसभामा निर्वाचित भएका छन् । ४१ वर्षदेखि ५० वर्षसम्मका १३ जना छन् । ५० वर्षदेखि ६० वर्षसम्मका सबैभन्दा बढी २२ जना छन् । १२ जना भने ६० देखि ७० वर्ष उमेर समूहका रहेका छन् ।

दुईजनाको वृद्धभत्ता खाने उमेर भइसकेको छ । कांग्रेसका गयानन्द मण्डल (७९) र एमालेका रोहितबहादुर कार्की (७१) वृद्धभत्ता पाउने ६८ वर्षको उमेर पार गरिसकेका सांसद हुन् ।