प्रतिनिधिसभा चुनावपछि वामपन्थी गठबन्धनको चर्चा चलिरहेको समयमा नेकपा (माओवादी केन्द्र)का महासचिव देव गुरुङले एमाले अध्यक्ष केपी शर्मा ओलीसँग भेटवार्ता गरेका छन् ।

बधाई दिने बहानामा ओलीलाई भेट्न महासचिव गुरुङ मंगलवार ओलीनिवास बालकोट पुगेका थिए । 

बालकोटमा झण्डै एक घण्टा बिताएका गुरुङ र ओलीबीच समसामयिक विषयमा छलफल भएको थियो ।

‘बधाई दिनका लागि हिजो ओलीको निवासमा गएको हुँ । बधाई दिनेबाहेक अरू धेरै कुरा हुन पाएन,’ गुरुङले बुधवार लोकान्तरसँग भने । 

माओवादी स्रोतका अनुसार गुरुङले वामपन्थी एकताका लागि पहल गर्न ओलीसँग आग्रह गरेका थिए ।

माओवादीभित्र गुरुङलगायत नेताहरू चुनावअघि नै वामपन्थी तालमेलको पक्षमा रहँदै आएका थिए ।

एमाले उपमहासचिव पृथ्वी सुब्बा गुरुङसँग पराजित भएलगत्तै पनि माओवादी महासचिव गुरुङले वामपन्थी एकताका लागि पहल गर्न आग्रह गरेका थिए । 

सत्ता गठबन्धभित्र ‘पावर शेयरिङ’को विषयमा विवाद भइरहेका बेला एमाले र माओवादीका दोस्रो तहका नेताबीच पनि कुराकानी भइरहेको छ ।