शहरी विकासमन्त्री मेटमणी चौधरीले काठमाडौं उपत्यकाभित्र देखिएका सुकुम्बासी समस्या समाधान गर्न सबै पक्षको सहयोग र सहमति आवश्यक रहेको बताएका छन् । उनले काठमाडौं शहरको सौन्दर्यमा प्रतिकूल असर पार्ने फोहोरमैलाको व्यवस्थापन तथा नदीकिनारामा रहेका सुकुम्बासी बस्तीको व्यवस्थापन कार्य चूनौतिपूर्ण रहेको उल्लेख गर्दै त्यसको समाधानका लागि सबै पक्षको सहयोग र सहमति आवश्यक रहेको प्रष्ट पारेका हुन् । 

२८औँ महानगर दिवसको अवसर पारेर बिहीबार काठमाडौंमा आयोजित एक कार्यक्रममा बोल्दै मन्त्री चौधरीले काठमाडौंलाई व्यवस्थित, सफा र सुन्दर शहर बनाउन आवश्यक पूर्वाधारको विकास गर्न ठोस कार्यहरू सञ्चालन गर्न ढिलाई गर्न नहुने पनि स्मरण गराए । महानगरपालिकालाई बसोबासयोग्य, प्रदुषणरहित वातावरणमैंत्री बनाई महानगरबासीहरूको आधारभूत आवश्यक्ता परिपूर्ति गर्न काठमाडौं महानगरपालिकाले खेल्दै आएको भूमिका महत्वपूर्ण रहेको उल्लेख गर्दै उनले यस काममा नेपाल सरकारले पनि सक्दो सहयोग गरिरहेको र त्यसलाई निरन्तर अघि बढाउने प्रतिबद्धता व्यक्त गरे । 

‘काठमाडौं उपत्यका देखिएको फोहोरमैलाको समस्यालाई समाधान गर्न, दिनप्रतिदिन विभिन्न नदीका किनाराहरूमा बढदै गएको बसोबास एवं बसोबासीहरूको व्यवस्थापन गर्ने कार्य चुनौती बन्दै गएको छ’, मन्त्री चौधरीले भने, ‘शहरको सौन्दर्य प्रत्यक्ष असर पार्ने यस्ता समस्याहरूलाई समयमै समाधान गर्न अति जरुरी भईसकेको छ । जसका लागि सबै पक्षको सहयोग र सहमतीको आवश्यक्ता पर्दछ । आगामी दिनहरूमा यस्ता समस्या एवम् चुनौतिहरूको सामना गर्न काठमाडौं महानगरपालिका समक्ष तथा सफल हुनेछ भन्ने विश्वास गरेको छु ।’

मन्त्री चौधरीले महानगरभित्र देखिएका फोहारमैलालगायतका समस्या समाधान गरी अघि बढ्न काठमाडौं महानगरपालिका सफल हुने विश्वाससमेत व्यक्त गरे । उनले बसोबासयोग्य शहरको रुपमा काठमाडौं महानगरपालिकालाई कायम गर्न आफ्नो मन्त्रालयले गरिरहेको सहकार्यलाई अझ बढावा दिने पनि बताए । रासस