नेकपा माओवादी केन्द्र रुपन्देहीका इञ्चार्ज हकिकुल्लाह खानले पदबाट राजीनामा दिएका छन् । गत मंसिर ४ गते भएको प्रतिनिधिसभा र प्रदेशसभा सदस्य निर्वाचनमा माओवादी केन्द्रको तर्फबाट रुपन्देहीमा प्रत्यक्षतर्फ एक जना पनि उम्मेदवार विजयी गराउन नसकिएको भन्दै खानले नैतिकताका आधारमा राजीनामा दिएका हुन् ।

सोमबार विज्ञप्ति जारी गर्दै नेता खानले प्रतिनिधिसभा र प्रदेशसभामा एक जना पनि प्रतिनिधित्व गराउन नसकिएको र समानुपातिक मत पनि २०७४ को तुलनामा धेरै घटेकाले आफूले नैतिकताको आधारमा राजीनामा दिएको बताएका छन्।

प्रतिनिधिसभामा मुस्लिम क्लष्टरसमेत गुमेकाले नेकपा (माओवादी केन्द्र रुपन्देहीको इञ्चार्ज र मुस्लिम मुक्ति मोर्चा केन्द्रीय इञ्चार्ज पदमा समेत रहिरहन नैतिकता नभएको उनको भनाइ छ ।

 ‘यी दुवै इञ्चार्ज पदबाट आजकै मितिदेखि लागू हुने गरी राजीनामा दिएको छु, यसबाट पार्टी पंक्ति एवं मुस्लिम मुक्ति मोर्चा–नेपाल सम्बन्ध सबै सदस्यहरुमा पर्न जाने असरप्रति क्षमाप्रार्थी छु, ’ उनले विज्ञप्तिमा उल्लेख गरेका छन् । मुस्लिम मुक्ति मोर्चा–नेपालका केन्द्रीय इञ्चार्ज खान पूर्वभूमिसुधार राज्यमन्त्री समेत हुन् ।