नेकपा एकीकृत समाजवादीका अध्यक्ष माधव नेपालले नयाँ सरकार गठन गर्ने बारेमा एमाले अध्यक्ष केपी शर्मा ओलीसँग छलफल गर्नेबारे आएको प्रस्तावमा आफूले हुन्छ भनेर सहमति दिएको बताएका छन् । 

गत आइतवार बालुवाटारमा कांग्रेससँग सरकारको नेतृत्वबारे कुरा नमिलेपछि प्रचण्डले केपी ओलीसँग तीनै जना बसेर छलफल गर्ने प्रस्ताव गरेको र आफूले त्यसमा सहमति जनाएको माधव नेपालले बताए ।  

नेकपा एकीकृत समाजवादी सुदूरपश्चिम प्रदेशले पार्टीको केन्द्रीय कार्यालयमा आयोजना गरेको प्रतिनिधि तथा प्रदेशसभामा निर्वाचित सभासद्हरूलाई बधाइ तथा शुभकामना दिन आयोजित कार्यक्रममा नेपालले सरकार गठनको लागि कांग्रेस नेतृत्वको गठबन्धनमा भएको छलफल सविस्तार सुनाएका हुन् । 

‘अन्तिम समयमा आएर कार्य सम्पादन समितिको निर्णय देखाएर कांग्रेसले राष्ट्रपति र प्रधानमन्त्री दुवै नछाड्ने भयो । त्यसपछि अब गठबन्धन काम लागेन भनेर निस्कियौँ र बालुवाटारमै केहीबेर प्रचण्डसँग बसेर छलफल गर्‍यौँ । त्यही बेला प्रचण्डले केपी ओलीसँग तीनैजना नेताहरू मिलेर छलफल गरौँ भन्ने प्रस्ताव गरे । मैले त्यसबेला हुन्छ भनेको थिए’, गत आइतवारको घटनाक्रम सुनाउँदै नेपालले भने । 

बालुवाटारबाट पार्टी कार्यालय आएर पार्टीको बैठक बोलाएपछि रवि लामिछाने, उपेन्द्र यादव र राजेन्द्र लिङ्देनलाई फोन गरेर बोलाएको उनले सुनाए । 

‘पार्टी कार्यालय आएर बैठक बोलाए । त्यसपछि रवि लामिछाने उपेन्द्र यादव र राजेन्द्र लिङ्देनलाई फोन गरे । रविले बालकोट जाँदै छु भने । रविलाई पनि बालकोटले तानेछ भन्ने लाग्यो । उपेन्द्रले आउँछु भने । राजेन्द्रको फोन लागेन । खुमलटार जान्छु भनेर हिँडेका प्रचण्ड बालकोट पुगेछन्’, नेपालले भने ।

दिउँसो ४ बजे कांग्रेस सभापति शेरबहादुर देउवाले फोन गरेर प्रचण्डलाई पहिलो कार्यकालको प्रधानमन्त्री दिन्छु बोलाइदिनुस् भनेको पनि नेपालले सुनाए । 

उनले भने, ‘दिउँसो ४ बजे प्रचण्डलाई प्रधानमन्त्री दिन्छु बोलाइदिनुस् भनेर फोन आयो । समयमा बुद्धी पुर्‍याउनुभएन अहिले बोलाएर के गर्ने ? उता सहमति भइसक्यो भने ।’ 

गठबन्धनमा प्रधानमन्त्रीमा अगाडि बढ्न प्रचण्डलाई आफूले नै सल्लाह दिएको नेपालले बताए । 

‘रवि लामिछानेले क्रान्तिकारी कुरा गरेर आएका छन् । तर, जनताको असन्तुष्टि सम्बोधन गर्न शेरबहादुरबाट हुँदै प्रचण्ड नै अगाडि सर्नुपर्छ भनेर मैले नै भनेको हो । तर, प्रचण्डले एक्ला–एक्लै भेटेर खुसुखुसु कुरा गरेर प्रधानमन्त्रीको आश्वासन लिइहाल्नुभयो’, उनले भने । पछि देउवाले प्रधानमन्त्री दिन आनाकानी गरेपछि पहल गरिदिनुपर्‍यो भनेर प्रचण्ड भन्न आएको पनि नेपालले बताए ।