नेकपा माओवादी केन्द्र गण्डकी प्रदेशसभा संसदीय दलको नेता हरिबहादुर चुमान हुने भएका छन् । आइतवार बिहान बसेको माओवादी गण्डकी प्रदेश कमिटीको बैठकले उनलाई संसदीय दलको नेता चयन गर्ने निर्णय गरेको हो । 

केन्द्रीय कमिटीको सल्लाहमा उनलाई सर्वसम्मत संसदीय दलको नेता बनाउने निर्णय भएको एक नेताले जानकारी दिए । यद्यपि, संसदीय दलको बैठक भने बस्न बाँकी छ । संसदीय दलको बैठक बसेर चुमानलाई सर्वसम्मत दलको नेता चयन गरिने बताइएको छ । 

चुमान तनहुँ १ (२) बाट गण्डकी प्रदेशसभामा विजयी भएका थिए । उनी यसअघि एमाले नेता पृथ्वीसुब्बा गुरुङ नेतृत्वको प्रदेश सरकारमा आन्तरिक मामिला र कानूनमन्त्री थिए । 

६० सदस्यीय प्रदेशसभामा सबैभन्दा ठूलो दल भएको नेपाली कांग्रेसका २७ जना सांसद छन् । नेकपा एमालेबाट २२, माओवादी केन्द्र ८, राप्रपाका २ र १ जना स्वतन्त्र सांसद छन् । मनाङबाट स्वतन्त्र सांसद जितेका राजिव गुरुङ (दीपक मनाङे)ले नेकपा एकीकृत समाजवादी प्रवेश गरेका छन् । यद्यपि, उनले प्रदेशसभा सचिवालयलाई भने आफूले दल प्रवेश गरेको औपचारिक रुपमा जानकारी गराउन बाँकी छ ।