‘बगेको खोली फर्किन्छु भन्छ
कल्लेनी केहीबेर पर्खिन्छु भन्छ
तिमीलाई देखेर माया, तिमीलाई देखेर
ए हो र माया
मै राम्री छु र !’
यो रोमान्टिक आधुनिक गीतले पछिल्लो एक महिनायता युट्युब र टिकटकमा कब्जा जमायो ।

३३ दिनमा युट्युबमा १ करोड भ्युज पार गर्यो गीतले । 

अहिलेसम्म सबैभन्दा बढी टिकटक भिडियो यही गीतमा बने । निर्माणपक्षका अनुसार गीतमा ३७ लाख बढी टिकटक भिडियो बनेका छन्, जुन अहिलेसम्मकै सर्वाधिक हो । 

हिमाल सागर र अनु चौधरीको स्वर रहेको गीतलाई स्रोता एवं दर्शकहरुले यति रुचाए कि गीतको कम्पन अझै सेलाएको छैन ।

विमल अधिकारीको शब्द, संगीत रहेको गीतलाई कमल सौरागले एरेन्ज गरेका हुन् । 

मौसम हिमालीको कोरियोग्राफी एवं निर्देशनमा तयार भिडियोमा विमल र सनिशा भट्टराईको अभिनय छ ।

गीत सार्वजनिक भएसँगै चर्चामा पुगेको थियो । गायक हिमाल सागर गत शुक्रबार जाजरकोट पुगेका थिए, महोत्सवमा प्रस्तुति दिन ।

स्टेजमा उक्लिएर उनले गुनगुनाउन थाले, ‘बगेको खोली फर्किन्छु भन्छ...।’ 

दर्शकहरु हुटिङ गर्दै उनीसँगै स्वरमा स्वर मिलाएर गाउन थाले ‘कल्लेनी केहीबेर पर्खिन्छु भन्छ ।’

हिमालले गीत गुनगुनाएर सके, तर दर्शकहरुको रहर सकिएन । ‘वान्स मोर...वान्स मोर’ भीडबाट आवाज आइरह्यो । 

हिमालले पुनः गीत गाए । दर्शकहरुलाई त्यसपछि पनि रहर पुगेन । उनले तीन, चार, पाँच, छ, सात, आठ पटक यही गीत सुनाए । ‘ए होर माया ८ पटक गाउनुपर्यो’ कार्यक्रमबाट फर्किएपछि उनले सुनाए, –‘एउटा स्टेजमा ८ पटक एउटै गीत गाउनुपरेको जिन्दगीकै पहिलो अनुभव हो । अर्को जुनीमा पनि सायद यस्तो हुँदैन होला ।’  अन्य स्थानका स्टेज कार्यक्रममा पनि ३/४ पटकसम्म यस गीत गाउनु अनिवार्यजस्तै भएको उनी सुनाउँछन् ।

गीतकार, संगीतकारले तयार पारेका गीत हिट भएसँगै गायक/गायिकाहरू स्टेज कार्यक्रममा व्यस्त हुने गरेका छन् ।

यद्यपि, अधिकांश गायक, गायिकाहरूले स्टेजमा गीत गाउँदै गर्दा गीतकार एवं संगीतकारको नाम लिन हिच्किच्याउँछन् । 

गायक हिमाल भने स्टेजमा गीत गाउँदा सम्बन्धित गीतको गीतकार एवं संगीतकारको नाम लिने गरेका छन् ।

उनले अरु गायक/गायिकाहरूलाई समेत स्टेजमा गीत गाउँदा सम्बन्धित गीतको गीतकार एवं संगीतकारको नाम लिन अनुरोध गर्छन् ।