गृहमन्त्री रवि लामिछानेले अगुवा–पछुवा सुरक्षाकर्मीसहितको गाडी हटाए

उपप्रधान एवम् गृहमन्त्री रवि लामिछानेले अगुवा–पछुवा सुरक्षाकर्मीसहितको गाडी हटाएको बताएका छन् । यससँगै आजैदेखि अगाडि एउटामात्र गाडी सुरक्षामा राख्ने निर्णय गरेको लामिछानेले सामाजिक सञ्जालमार्फत जानकारी दिएका छन् । 

‘नागरिकलाई सुरक्षित महसुस  हुने वातावरण निर्माण गर्ने निकाय हो गृह प्रशासन। म यसको नेतृत्वमा रहँदा, म मात्र उच्च सुरक्षा घेरामा हिँडडुल गरेर नागरिकको अपेक्षा पुरा हुँदैन’, लामिछानेले भनेका छन्, ‘म मेरो भन्दा पनि नागरिकको सेवा र सहजताका लागि काम गर्न यो जिम्मेवारीमा आएको हुँ । म आफूले बोलेका कुरा इमानदारिताका साथ पुरा गर्नेछु।’

उपप्रधान एवम् गृहमन्त्रीको नियुक्ति लगत्तै आफ्नो सुरक्षामा खटिने प्रहरी निरीक्षकको नेतृत्वलाई घटाएर प्रहरी नायब निरीक्षक (सई) नेतृत्वको सुरक्षाकर्मी राखेको पनि लामिछानेले जानकारी दिएका छन् । 

सडक नियमको पूर्ण पालना गर्ने प्रतिबद्धता जनाउँदै लामिछानेले विदाका दिनमा व्यक्तिगत सवारीसाधन प्रयोग गर्नेसमेत प्रतिबद्धता जनाएका छन् ।