१ नम्बर प्रदेशका प्रदेश प्रमुख पर्शुराम खापुङले प्रदेश सरकारको मुख्यमन्त्री दाबी गर्न दलहरूलाई दिएको समय सीमा आइतवार साँझ ५ बजे सकिँदैछ ।

समय सीमा नजिकिँदै गएपछि भने दलहरू छलफलमा जुटेका छन् । औपचारिक रूपमा दलहरू छलफलमा जुटेका हुन् ।

तोकिएकै समय सीमाभित्र दाबी पेश गर्ने गरी छलफलमा जुटिएको एमालेका प्रदेश कमिटीका अध्यक्ष तुलसी न्यौपानेले बताए । 

एमालेका हिक्मत कार्कीलाई सत्ता गठबन्धनले मुख्यमन्त्रीमा अगाडि सार्ने भएका छन् । ‘आइतवार मुख्यमन्त्रीको दाबी पेश गर्ने मात्रै हो, अन्य सहमति पछि हुँदै जान्छ,’ न्यौपानेले भने, ‘अब बैठक बसेर कति बजे जाने भनेर टुंगो लगाउन मात्रै बाँकी छ ।’

गठबन्धनका शीर्ष नेताको ९ बजे बस्ने भनेको बैठक शुरू भएको छैन । 

माओवादीका नेताहरूले पनि सहमति भएको जनाएका छन् । ‘मुख्यमन्त्रीको सहमति भएको छ,’ माओवादी संसदीय दलका नेता ईन्द्रबहादुर आङवोले भने, ‘थप छलफल गर्छौं ।’

पुस १७ गते प्रदेश प्रमुखले १ हप्ताको समय दिएर संविधानको धारा १६८ को उपधारा २ बमोजिम मुख्यमन्त्रीको दाबी गर्न आह्वान गरेका थिए । अहिलेको सत्ता गठबन्धनमा ६० सांसद छन् । एमाले ४०, माओवादी केन्द्र १३, राप्रपा ६ र जसपाका १ सांसद छन् । 

प्रदेश प्रमुख कहाँ पेश गर्नका लागि हस्ताक्षर भने नसकिएको सांसदहरूले बताएका छन् । सत्ता गठबन्धनका शीर्ष नेताहरूको छलफलपछि लगत्तै हस्ताक्षर गरिने अधिवक्ता समेत रहेका सांसद लीलाबल्लव अधिकारीले बताए ।