प्रदेश १ प्रदेश सभाको सभामुख चयनको कार्यतालिका मंगलवार सार्वजनिक हुँदैछ ।

मंगलवार बस्ने प्रदेश सभाको बैठकले सभामुख चयनको प्रक्रिया थाल्नेछ । सभामुखको निर्वाचन आगामी २८ गतेका लागि तोकिएको छ । 

प्रदेश १ सरकारको मुख्यमन्त्री एमाले र सभामुख माओवादीले पाउने गरी यसअघि नै केन्द्रमा सहमति भइसकेको छ । सोहीअनुसार एमाले नेता हिक्मतकुमार कार्की प्रदेश १ सरकारमा मुख्यमन्त्री भएका छन् ।

सभामुखमा माओवादी केन्द्रले दिएको उम्मेदवारीलाई एमालेले समर्थन गर्नेछ । माओवादी स्रोतले दिएको जानकारीअनुसार ओखलढुंगा क्षेत्र नम्बर २ बाट निर्वाचित सांसद बाबुराम गौतमलाई माओवादी केन्द्रले सभामुखको उम्मेदवार बनाउने तयारी गरेको छ ।

यसअघि माओवादी केन्द्रबाट सभामुखमा संखुवासभा क्षेत्र नम्बर १ का सांसद राजेन्द्र कार्कीको नाम सार्वजनिक भएको थियो । कार्कीले सभामुख भन्दा मन्त्री बन्ने इच्छा देखाएका कारण बाबुराम गौतम नै सर्वसम्मत उम्मेदवार बन्ने सम्भावना बढेको एक सांसदले बताए ।

माओवादी केन्द्रबाटै सभामुखमा महिला सांसद गीता तिम्सिनाले पनि दाबी गरेकी छन् । यद्यपि उनलाई माओवादी केन्द्रले उम्मेदवार बनाउने सम्भावना कम रहेको बताइएको छ । गौतम नै सभामुखको उम्मेदवार बनेको खण्डमा उनलाई एमालेका ४०, माओवादी केन्द्रका १३, राप्रपाका ५ र जसपाका १ गरी ६० सांसदको समर्थन प्राप्त हुनेछ । ९३ जना सांसद रहेको प्रदेश सभामा बहुमतका लागि ४७ सांसद आवश्यक पर्छन् । ६० सांसदको समर्थन प्राप्त भए गौतम प्रदेश सभाको दोस्रो सभामुख बन्नेछन् ।

प्रतिपक्षीको बेन्चमा रहेका नेपाली कांग्रेस र नेकपा एकीकृत समाजवादीले सभामुखको उम्मेदवारबारे कुनै निर्णय गरेका छैनन् ।